Kereban ngajar ke digaga ngena chara audio visual ( power point)

Beterima Kasih enggau utai to dikemisi kitai..

Latih Kssr Jaku Iban Sekula Primari 1

Dunya Penemu

Latih Kssr Jaku Iban Sekula Primari  1

Aktiviti 2

Tipakka gambar buah di baruh tu enggau sepil ke engkeman

Aktiviti 3
Tusun leka jaku tu nyadi ayat ke betul

Latih Kssr Jaku Iban Sekula Primari 1

Kisah IBU & Anaknya....

 

 

TIKAI

 

Tikai nya bidang utai dianyam tauka dipakan lalu dianchau di atas geladak tauka gelegar rumah alai duduk tauka gali. Setengah pelilih menua ngumbai tikai nya kelaya. Tikai tau dilangup, digiling lalu bisi mega sekeda bansa tikai tau ditikal. Sebengkah ari pengawa indu Iban menya iya nya pengelandik nganyam tikai. Tikai tu mayuh bansa bepanggai ba bansa utai ke dianyam iya lalu nitihka guna enggau iya. Bansa tikai selalu diberi nama ngangkatka nama utai ti diambi ke bila iya ti dianyam. Sekeda utai ti tau dianyamka tikai nya baka rutan, bemban, senggang, bundung, kerupuk, akas enggau purun.

Bansa Tikai

Tikai bemban nya tikai ti digaga ari kulit batang bemban. Tikai tu selalu dianchau tiap-tiap hari kelebih agi nyadika alai tinduk.

Tikai wi tauka rutan nya tikai ti dianyam ari bila wi tauka rutan.

Tikai lampit nya tikai ti digaga ari wi tauka rutan tang bebila tebal ditusuk ngena bila wi empu tang diatu bisi mega orang ngena tali tansi.

Tikai kelasah nya tikai ti selalu disebut dalam leka main. Tikai tu bebilaka wi tauka rutan dibelah kasar lambar lalu dianyam bebidang besai.

Tikai mengkuang nya tikai ti dianyam ari daun mengkuang ti udah dipanduk awakka burak lalu dijila alus.

Tikai panchar nya tikai bebilaka daun mengkuang panduk lambar lalu bila iya dijalih enggau mayuh chura enselup.

Tikai anyam bebuah nya tikai ti bebilaka bemban, wi tauka rutan, dibelah alus lalu dianyam bisi buah tauka ukir diteladan. Tikai ayam bebuah tu dianchau lebuh begawai, selamat, pengerami melah pinang tauka maya bisi pengawa bukai.

Tikai burit nya tikai ti pemadu mit semina teman burit duduk. Tikai tu dianyam bebuah bebilaka wi tauka rutan. Tikai bansa tu tikai ngepan, ditangkin lelaki ngimbai burit. Iya ke lapik duduk lebuh ngetu bejalai. Kelia lelaki Iban suah mai tikai burit kediri empu maya ngabang ngagai rumah orang ngambika ulih duduk sebarang alai.

Idas tauka bidai nya tikai ti pemadu besai. Iya ulih mungkur sebelah ruai. Idas belambarka wi tauka rutan. Wi nya dibelah kasar lalu dipakan enggau lambar temeran tauka kulit tekalung. Idas dikena ngerangkaika padi tauka buah lada.

Sana nya tikai mit ti dianchau nyadi antap ruai baka ti enggau tikai bukai digaga baka ke ngaga idas mega.

Tikai perampan tau mega disebut tikai tampung senggang nya tikai ti dianyam ari kerupak senggang bebila kasar lalu dikena nyembui padi, lada, engakabang tauka utai bukai.

Tikai kerupuk nya tikai ti dianyam ari daun kerupuk sereta bebila kasar.

Tikai perau nya tikai belebak anyam dua, dikelulu nyadi perau manang lebuh iya belian.

Tikai purun nya tikai ti dianyam ari batang purun paya ti bebatang kasar.

Tikai belebak nya tikai ti enda besai ti dianyam enda betampung.

Tikai empeda nya tikai ti dianyam ari empeda tauka linti bemban.

Buah Tikai

Buah tikai nya ukir ti ngasuh tikai nya dipeda manah lalu mandangka pengelandik orang ke nganyam iya. Sekeda ari buah tikai nya baka buah bangkit, buah enseluai, buah lingkuk, buah rambing, ulat entadu, tudung lung enggau mulung merangau.

Sebansa tikai ti deka dikenang enggau silik ditu nya tikai senggang.

Tikai Senggang

Senggang ke manah diambika bila tikai nya senggang ke tumbuh ba temuda di menua ulu ti langgang dipumai entara tiga ngagai enam taun. Batang senggang ti tumbuh ba temuda tu bisi bendar bida ari iya ti tumbuh ba pengerang. Senggang temuda tumbuh ba endur ke tampak panas. Tu ke ngasuh iya enda pulu sereta tan. Nyadi senggang pengerang amat mih batang iya panjai, tang iya enda tentu manah laban enda liat.

Renggat pengawa ngambi senggang dataika iya nyadi tikai nya mayuh bendar. Udah madang senggang ditemu, batang senggang ke pemanah iya penuai lalu dipampat. Senggang ti udah dipampat nya tadi lalu diirit ngagai palan alai nyembui batang senggang. Alai nyembui nya dikumbai sadai. Ba sadai senggang tu ditunsangka semua. Reti nya pun batang senggang dipanggai ba kayu ti alai nyadai nya awakka ujung iya terengkah ba tanah. Udah langgang tiga hari ngagai seminggu, takang daun ti nyau udah layu lalu dikeris. Kerupak senggang ti keru tauka retai lalu dikerupaika.

Tembu nya, senggang nya tadi lalu diberekas enggau randau tauka ribis lalu dibai pulai ke rumah. Datai di rumah, pengawa ngupak senggang belabuh.

Batang senggang ditetak ba pun kerupak senentang pusat senggang. Kerupak tu dikupak ari batang senggang lalu digulung awakka iya enda ngeruyung. Gulung kerupak senggang pan ditusuk nyadi sengkilung senggang ngena kerupak puak iya empu.

Udah nya senggang pan lalu ditejuka dalam rumah sepengelama dua tauka tiga hari. Kebuah ngagai iya baka tu ngambika senggang nya madai sereta liat lalu enda balat betulang lebuh iya dilinsing.

Udah sengkilung senggang nya rangkai, iya lalu diunjur sereta dikerembaika. Pun kerupak senggang ti udah disimpul lebuh ke ngulung iya suba diatu lalu ditetak. Simpul senggang ti dibuai nya disebut pala senggang. Kerupak senggang ti nyau lurus sereta ngerembai tu lalu disemelaka dulu apin iya dijila nyadi lambar tauka bila tikai. Tisau bila ke dibuai nya dikumbai linsing senggang.

Lebuh belabuh nganyam, bila senggang diengkahka ba atas tikai bukai ke udah tembu. Bila tu dianyam ngena anyam dua ba tisau, lalu dianyam diri ba puak iya. Tisau tikai dianyam dua awakka iya mudah disilup. Silup tikai tu beguna bendar laban ba tu ujung bila tikai nya disilupka nyerak anyam iya ti udah. Tu ke ngasuh tikai nya tegut lalu enda mudah tekusai tauka ridang. Rambut silup tikai nya diketas lalu nujungka tikai nya tembu lalu tau dianchau.

Tikai senggang mudah agi dianyam laban iya enda bebuah lalu bila iya kasar. Iya enda dianchau ba tengah bilik tauka ruai. Iya semina dikena ngantap pantar tauka tempuan.

Nya tadi penerang senentang bansa tikai ti bisi dikembuanka raban bansa Iban dianyam indu Iban. Kemaya hari tu pengelandik tu jauh bendar kurang dikemeranka indu Iban ketegal ke mayuh agi pengawa moden ti udah ngerasuk pendiau enggau pengidup raban bansa Iban. Taja pia raban gerempung ukai perintah ti bisi kaul bansa Iban patut bendar ngambi inisiatif ngidupka pengawa ngayam tikai ngagai nembiak rebak baru sebedau penglandik tu nadai agi ditemu kitai.

 

TUSUN TUNGGU KITAI IBAN

1. Sejampar – 5 sen

2. seliar – 7 sen

3. setali – 9 sen

4. se uta – 10 sen

5. sigi menukul – 30 sen

6. sigi jabir – 50 sen (diatu seringgit)

7. sigi mungkol – seringgit

8. sigi panding – 2 ringgit

9. tiga mungkol – 3 ringgit

10. sigi alas – 4 ringgit

11. alas ngerang – 5 ringgit

12. rusa indu – 8 ringgit

13. rusa lelaki – 10 ringgit

14. sigi menaga – 16 ringgit

         15. sepikul – seratus ringgit

Adat sereta pemali berumah:

 

Tuai rumah ti bempu tanggung pengawa bebaika nembiak redak iya baum tauka ngudung enti sida deka pindah ngaga rumah panjai ke baru. Sebedau berumah sida deka berandau netapka tempat alai ngagai rumah panjai ke baru baka:

 

a) tanah endur rumah

b) penyampau pintu ke deka enggau berumah baru

c) ripih bilik

d) sebarang pekara ke bukai ti besangkut paut enggau berumah.

 

1. Penyalah mungkir danji enggau berumah.

Sebarang sapa bula deka kena ukum dua pikul sepintu

2. Enda nyadi nampung rumah panjai

16 mungkul

babi siku

kering semengat

3. Pemali ngachau kayu burung

8 mungkul

genselan manuk siku

kering semengat

4. Pemali ngacau tanah udah dirembang alai berumah

8 mungkul

genselan manuk siku

kering semengat

 

 ADAT NGULIT

Belabuh ari Serapuh diajar ulih antu puntang raga, laban sida ti berunggu mayuh amat mati. Diajar meri baya chukup-chukup, diajar ngulit ke ditampung kitai diatu.

1. serara bungai – enggau manang nitih ke timpuh aum rumah

2. ngetas ulit – semua ke ngulit ditetak buk

3. ngambi entebalu – kaban ari sepiak ngambi entebalu, dua kali ganda adat pemati(chunto:ti bini mati,kaban sepiak ari kaban bini ngambi entebalu,ukai kaban laki), buk diguntin,diminyak lalu disugu,enti laki beragum lalu dikendis,kukut dipapal,lalu tau ngemujang tauka ngenara ke diri

4. entebalu tau diambi lepas 6 bulan

5. tebalu mansau tau diambi lebuh maya Gawai Rugan(Gawai Antu)

6. Orang ngacau balu maya agi ngulit dikumbai butang antu belaki tauka bebini dikumbai berangkat antu

7. bebini tauka belaki maya agi tungkun api dikumbai berangkat tulang

8. Guang seduai Sendi butang antu diukum sepikul(RM100)

ADAT ULIT

1. Penyauh enggau pemati kawasan ulit nitih ke setuju bala mayuh

2. adat ka dibai urang ka mati nitih ka tipak pengawa ti dikereja iya lebuh agi idup

3. enti urang bisi ngabang nitih kandang ulit,sida enda tau enda nganjung adat,sigi panding,benda basa RM2

4. enti ulit udah buya adat sigi jabir

5. enti bala ka semakai gawai bisi begawai ngambi ngabang sida mai adat benda,sigi panding RM2,sigi jabir ngagai urang ke empu pemati lalu sigi jabir kena ngangkat ka rumah ngabang

 

ADAT NGEMAS PEMATI

1. Sebedau iya ke mati disimpan dalam sentubung sebayan mesti diberi makai

2. sentubung mesti ditumbak penalam 6 kaki

3. lebuh malam balu jenila enggau pintu mesti ditambit rapit

4. tungkun api sama enggau pemakai sebayan, tiga lemai nya

5. tiga lemai nya meh indai tuai dipilih makai pulut chelum

6. pulai nganjung antu,ulit lalu ditanggam,pengelama nitih ke kaban belayan ke empu pemati

 

ADAT JAMBAN

Urang keterubah ngaga adat jamban tu ngaga Antu Gerasi Belang Pinggang lebuh iya jadi enggau Gupi,anak umbung Bada seduai Riduh. Kitai Iban ke dulu minta adat jamban ianya Raja Berani ke benama Awan lebuh iya jadi melaki bini nguai ke Lada anak Uyut Bedilang Besi. Nya ke ditunda kitai kemaya ari tu

 

ADAT BESAPAT(JADI MALI)

1. Babi dua iku.siku enggi lelaki,siko enggi indu,bunuh ba ai lalu darah kena mandi

2. pedang panjang kena ngerandang remang rarat

3. beliong lajong kena mungga urat lensat

4. sumpit tapang kena ngerejang lubang kilat

5. kumbu rayung kena nyerayong tekuyung dalam ungkap

6. kain berang kena miau mua ari sarat bebuat

7. pinggai besai kena nyekat tanah rarat

8. besi panti landi ke alai kaki betakat

9. rangki siti kena nasih ai ngambi ke enda beriap

10. tempayan endur nyimpan semengat

Orang keterubah ngena adat tu ianya Abang seduai Tali Bunga. Seduai tu baru sekali petunggal udah kena tinggang ukum 10 igi jabir.Mukol seduai Ibu ya Berenyan besapat maya tu kelia. Nitih ke adat Sengalang Burong,rumah iya rusak laban kudi laban pengawa endang mali.

 

ADAT DAPUR RUMAH PANJAI

Dapur chelap – genselan manuk siko

Sangkar sigi panding RM2.00(kebuk sigi)

 

ADAT GENSELAN MENUA

Ti mati di tanah tauka menua urang:-

1. babi siko ke udah tumbuh taring

2. pinggai sesingkap

3. sangkar sigi alas (RM4.00)

4. besi sebujur ke kering semengat

 

ADAT MELAH PINANG

Aji ke berani ati ngilah bulan, anak Sengalang Burong Aki Jugu Menaul Tuntung.

Endu Lilih Sintung Benih Pulut Balingian anak raja Sempulang Gana keterubah diatur ngena adat melah pinang bepun ari Sengalang Burong

 

ADAT MIRING

Bepun ari raja Semarugah ke milih menantu ke laki anak dara iya ke benama Endu Endun Serentum Tanah Tumbuh, entara Semupulang Gana seduai Bujang Inin.Urang ke nyadi menantu ya ianya Sempulang Gana

 

KETERUBAH NEMU MENGAP

Kitai nemu mengap bepun ari anak Numpi ke benama Lau Mua beranak ka geringu,Sumbang,Suduk enggau Malang diajar oleh Antu Sampang Gading.Sida empat diri menyadi tu ti keterubah belajar mengap.

 

ADAT BALANG TINCHIN(BULA KE SEMAIA)

BUP Adat Iban 1993-bagi 4 lumar 140 limpir 45

Adat pemalu 50 mungkul- RM50

 

BESUA TINCHIN(becherai manis)

Enti seduai melaki bini sama deka sarak nadai enggau laya,nadai kebuah taukaketegal mimpi tauka burung,ukai ketegal butang betumbang. Seduai deka beterang ba Penghulu tauka ba 2 iku tuai rumah. Siku ari indu,siku ari lelaki.

Adat Becherai Manis- seduai sama nyua ke tinchin tauka ssagin entara sigi alas-RM4. enti adat apin disua seduai apin tau bebas bujang dara. Enti bisi beleman enggau urang bukai seduai tau dititi adat butang- Adaat A1 1993 bagi 4 lumur 5(1) limpir 49

 

Butang tinchin

Penyalah dikira dalam kandang timpuh adat betunang. Enti indu tauka lelaki bisi beleman enggau urang bukai(having sexual relationship) benung timpuh kandang betunang. Diukaum sepikul RM100, pemalu RM50- Adat A1 1993 lumar 170 limpir 118 bup adapt iban(dal)

 

Berangkat Tinchin

Enti lelaki tauka indu benung diau dalam kandang betunangtang enda mukai mukai tak jadi enggau orang bukai. Diukaum sepikul RM100 pemalu RM50.-Adat A1 1993 lumur 174 limpir 55(DAL)

 

PEMATI KITAI IBAN

1. serta ngapus ke seput. Orang ka mati alu ditanggam mulut enggau mata.kaki ditaur enggau benang mansau

2. beri mandi

3. digari enggau utai manah lalu di baiya enggau keresa kena sebayan idup.

4. sapat enggau pua kumbu,enti udah kemas digari baru ditanggung keruai,diengkah dalam sapat.

5. alu enggau lesung dipelintang ka ba pala tangga,kena nagang bala sebayan niki ka dalam rumah.

6. lebuh bangkai ditanggung pansut ke ruai lalu ditabur enggau leka padi,enggai ke pemakai rua

7. kejang pulai ari pendam udah kemas numbak ka iya ke mati, siku ari sida ke tuai ngaga pengait kena ngait semengat pulai

8. siku ari sida sebilik ngaga serepak lalu ditanam tunsang ba tisau jalai pulai. Enggai ke semengai iya ke mati nitih pulai ke rumah.