TIKAI

 

Tikai nya bidang utai dianyam tauka dipakan lalu dianchau di atas geladak tauka gelegar rumah alai duduk tauka gali. Setengah pelilih menua ngumbai tikai nya kelaya. Tikai tau dilangup, digiling lalu bisi mega sekeda bansa tikai tau ditikal. Sebengkah ari pengawa indu Iban menya iya nya pengelandik nganyam tikai. Tikai tu mayuh bansa bepanggai ba bansa utai ke dianyam iya lalu nitihka guna enggau iya. Bansa tikai selalu diberi nama ngangkatka nama utai ti diambi ke bila iya ti dianyam. Sekeda utai ti tau dianyamka tikai nya baka rutan, bemban, senggang, bundung, kerupuk, akas enggau purun.

Bansa Tikai

Tikai bemban nya tikai ti digaga ari kulit batang bemban. Tikai tu selalu dianchau tiap-tiap hari kelebih agi nyadika alai tinduk.

Tikai wi tauka rutan nya tikai ti dianyam ari bila wi tauka rutan.

Tikai lampit nya tikai ti digaga ari wi tauka rutan tang bebila tebal ditusuk ngena bila wi empu tang diatu bisi mega orang ngena tali tansi.

Tikai kelasah nya tikai ti selalu disebut dalam leka main. Tikai tu bebilaka wi tauka rutan dibelah kasar lambar lalu dianyam bebidang besai.

Tikai mengkuang nya tikai ti dianyam ari daun mengkuang ti udah dipanduk awakka burak lalu dijila alus.

Tikai panchar nya tikai bebilaka daun mengkuang panduk lambar lalu bila iya dijalih enggau mayuh chura enselup.

Tikai anyam bebuah nya tikai ti bebilaka bemban, wi tauka rutan, dibelah alus lalu dianyam bisi buah tauka ukir diteladan. Tikai ayam bebuah tu dianchau lebuh begawai, selamat, pengerami melah pinang tauka maya bisi pengawa bukai.

Tikai burit nya tikai ti pemadu mit semina teman burit duduk. Tikai tu dianyam bebuah bebilaka wi tauka rutan. Tikai bansa tu tikai ngepan, ditangkin lelaki ngimbai burit. Iya ke lapik duduk lebuh ngetu bejalai. Kelia lelaki Iban suah mai tikai burit kediri empu maya ngabang ngagai rumah orang ngambika ulih duduk sebarang alai.

Idas tauka bidai nya tikai ti pemadu besai. Iya ulih mungkur sebelah ruai. Idas belambarka wi tauka rutan. Wi nya dibelah kasar lalu dipakan enggau lambar temeran tauka kulit tekalung. Idas dikena ngerangkaika padi tauka buah lada.

Sana nya tikai mit ti dianchau nyadi antap ruai baka ti enggau tikai bukai digaga baka ke ngaga idas mega.

Tikai perampan tau mega disebut tikai tampung senggang nya tikai ti dianyam ari kerupak senggang bebila kasar lalu dikena nyembui padi, lada, engakabang tauka utai bukai.

Tikai kerupuk nya tikai ti dianyam ari daun kerupuk sereta bebila kasar.

Tikai perau nya tikai belebak anyam dua, dikelulu nyadi perau manang lebuh iya belian.

Tikai purun nya tikai ti dianyam ari batang purun paya ti bebatang kasar.

Tikai belebak nya tikai ti enda besai ti dianyam enda betampung.

Tikai empeda nya tikai ti dianyam ari empeda tauka linti bemban.

Buah Tikai

Buah tikai nya ukir ti ngasuh tikai nya dipeda manah lalu mandangka pengelandik orang ke nganyam iya. Sekeda ari buah tikai nya baka buah bangkit, buah enseluai, buah lingkuk, buah rambing, ulat entadu, tudung lung enggau mulung merangau.

Sebansa tikai ti deka dikenang enggau silik ditu nya tikai senggang.

Tikai Senggang

Senggang ke manah diambika bila tikai nya senggang ke tumbuh ba temuda di menua ulu ti langgang dipumai entara tiga ngagai enam taun. Batang senggang ti tumbuh ba temuda tu bisi bendar bida ari iya ti tumbuh ba pengerang. Senggang temuda tumbuh ba endur ke tampak panas. Tu ke ngasuh iya enda pulu sereta tan. Nyadi senggang pengerang amat mih batang iya panjai, tang iya enda tentu manah laban enda liat.

Renggat pengawa ngambi senggang dataika iya nyadi tikai nya mayuh bendar. Udah madang senggang ditemu, batang senggang ke pemanah iya penuai lalu dipampat. Senggang ti udah dipampat nya tadi lalu diirit ngagai palan alai nyembui batang senggang. Alai nyembui nya dikumbai sadai. Ba sadai senggang tu ditunsangka semua. Reti nya pun batang senggang dipanggai ba kayu ti alai nyadai nya awakka ujung iya terengkah ba tanah. Udah langgang tiga hari ngagai seminggu, takang daun ti nyau udah layu lalu dikeris. Kerupak senggang ti keru tauka retai lalu dikerupaika.

Tembu nya, senggang nya tadi lalu diberekas enggau randau tauka ribis lalu dibai pulai ke rumah. Datai di rumah, pengawa ngupak senggang belabuh.

Batang senggang ditetak ba pun kerupak senentang pusat senggang. Kerupak tu dikupak ari batang senggang lalu digulung awakka iya enda ngeruyung. Gulung kerupak senggang pan ditusuk nyadi sengkilung senggang ngena kerupak puak iya empu.

Udah nya senggang pan lalu ditejuka dalam rumah sepengelama dua tauka tiga hari. Kebuah ngagai iya baka tu ngambika senggang nya madai sereta liat lalu enda balat betulang lebuh iya dilinsing.

Udah sengkilung senggang nya rangkai, iya lalu diunjur sereta dikerembaika. Pun kerupak senggang ti udah disimpul lebuh ke ngulung iya suba diatu lalu ditetak. Simpul senggang ti dibuai nya disebut pala senggang. Kerupak senggang ti nyau lurus sereta ngerembai tu lalu disemelaka dulu apin iya dijila nyadi lambar tauka bila tikai. Tisau bila ke dibuai nya dikumbai linsing senggang.

Lebuh belabuh nganyam, bila senggang diengkahka ba atas tikai bukai ke udah tembu. Bila tu dianyam ngena anyam dua ba tisau, lalu dianyam diri ba puak iya. Tisau tikai dianyam dua awakka iya mudah disilup. Silup tikai tu beguna bendar laban ba tu ujung bila tikai nya disilupka nyerak anyam iya ti udah. Tu ke ngasuh tikai nya tegut lalu enda mudah tekusai tauka ridang. Rambut silup tikai nya diketas lalu nujungka tikai nya tembu lalu tau dianchau.

Tikai senggang mudah agi dianyam laban iya enda bebuah lalu bila iya kasar. Iya enda dianchau ba tengah bilik tauka ruai. Iya semina dikena ngantap pantar tauka tempuan.

Nya tadi penerang senentang bansa tikai ti bisi dikembuanka raban bansa Iban dianyam indu Iban. Kemaya hari tu pengelandik tu jauh bendar kurang dikemeranka indu Iban ketegal ke mayuh agi pengawa moden ti udah ngerasuk pendiau enggau pengidup raban bansa Iban. Taja pia raban gerempung ukai perintah ti bisi kaul bansa Iban patut bendar ngambi inisiatif ngidupka pengawa ngayam tikai ngagai nembiak rebak baru sebedau penglandik tu nadai agi ditemu kitai.