1.0  Definisyen sistem fonetik enggau fonologi jaku iban

1.1  Definisyen sistem fonetik

Munyi jaku ti diasilka kereban artikulasyen nya ti dikumbai fonetik. Reti iya fonetik tu mansik senentang produksyen enggau perspepsyen munyi jaku. Tubuh kitai mensia bisi organ ti tau ngeluarka munyi jaku ngena mekanisme dalam tiga bengkah rumbang, iya nya rumbang mulut, rumbang idung enggau farinks. Kelimpah ari nya, fonetik ulih dibagi kitai ngagai tiga bansa maya ti ngasilka munyi jaku iya nya fonetik artikulasyen, fonetik akuistik enggau fonetik auditori.

a)    Fonetik artikulasyen

Mansik sesebengkah munyi ti diasilka rengka artikulari ba tubuh. Endur munyi nya diasilka disebut palan artikulasyen ti ngeluarka munyi jaku. Munyi jaku ti diasilka baka nyaris, mantik, begetar tauka semina meresih aja.

b)    Fonetik aukistik

Mansik gelumbang angin ti mai munyi nya ngagai pending mensia, iya nya mansik klasifikasyen munyi ti pansut ari mulut baka empas munyi, pengelantang munyi tauka pemanjai munyi sebut ti diasilka nya.empas munyi bepanggai ba penyuah munyi sura nyawa begetar. Empas munyi sada nyawa orang indu tinggi agi ari empas munyi sada nyawa orang ti laki, ( indu- 240 pusin sesikin enggau laki 150 pusin sesikin). Pengelantang munyi iya nya munyi ti diasilka siku- siku orang nya endang terang, nyaris sereta nyemetak didinga kitai. Iya ke penudi iya nya, pemanjai munyi sebut ti bepanggai ba pengelaju siti- siti leka jaku nya disebut.

c)    Fonetik auditori

Pengawa mending enggau proses ti nyadi lebuh ti nerima munyi lalu baka ni munyi nya tadi tau ulih didinga. Semua nya besangkut paut enggau perengka tubuh baka untak enggau pending. Keterubah iya, munyi ti didinga dibai gelumbang tauka alun munyi ti tama ke dalam pending. Lebuh ti nerima stimulus, ruding pending begetar lalu bagi tengah pending matak munyi nya ngagai palan penerima stimulus. Stimulus lalu dibai ngagai koklea ( lubang pending) lau ngasuh selaput dalam pending nya begetar lalu pending nya udah nerima munyi (penerang). Penerang ti ulih didinga pending nya lalu dibai ngagai untak lalu diproses reti munyi nya tadi.

1.2  Definisyen sistem fonologi

Mansik sistem munyi dalam sesebengkah jaku mensia. Bidang tu ti nyimpul, betungkapka lalu mida tukuh munyi jaku dikena nentuka atur enggau tukuh munyi jaku. Fonologi tu mega negika tukuh asal sistem munyi jaku.

2.0        Bida sistem fonetik enggau fonologi jaku iban

SISTEM FONETIK	SISTEM FONOLOGI
1)    Linguistik ti mansik utai ti nyadi ba sesebengkah menua baka ari sukut fizikal	a)    Linguistik ti mansik munyi jaku iya nya senentang guna, ulah enggau bansa munyi.
2)    Pansik senentang penteba ke asal, produksyen enggau perspepsyen munyi- munyi jaku ti diasilka.	b)    Pansik senentang sistem munyi bagi jaku enggau penteba ke asal. Semua ti bekaul enggau sistem dalam jaku
3)    Tau dibagi ngagai tiga bengkah iya nya fonetik akuistik, fonetik artikulatori enggau fonetik auditori.	c)    Pansik ti bekaul enggau utai ti leksikal enggau perengka ti leksikal ke bukai ti tau ngaga ayat.
4)    Mansik unsur bagi sesebengkah munyi.	d)    Pansik senentang intonasyen munyi jaku.
5)    Ngasilka transkripsyen fonetik bagi semua munyi ari semua jaku	e)    Ngasilka sistem sepil dalam jaku

3.0  Penemu tukuh senentang sistem fonetik enggau fonologi jaku iban

1)    David Abercrombie (1971), Elements of General

Fonologi tu sebengkah bidang linguistik ti ngembuan tukuh teknikal. Sesebengkah jaku dipeda ngena chara analitis, iya nya bejaku ukai semina mending tang beratika kinsit organ dalam tubuh mensia.

2)    Indrawati Zahid enggau Mardiah Shah Omar (2006), Fonetik enggau Fonologi

Pansik senentang munyi jaku ti diasilka organ tubuh mensia lalu munyi nya enda sama. Seduai iya mega beratika bakani munyi jaku nya tau dibagi nitihka bansa munyi, lalu jalai peninga tau ngelala munyi ti diasilka.

3)    Paitoon M.Chaiyanara (2006), Pengenalan Fonetik enggau Fonologi

Semua munyi jaku pansut ari mulut mensia lalu bidang fonetik mansik rengka tubuh mensia ti ngasilka munyi jaku.

4)    Abdullah Hassan (2006), Linguistik Am

Mansik munyi jaku ti didinga lalu dipechah ngagai unit ti mit agi lalu nerangka biuh reti ngagai orang ti mending jaku nya. Nerangka ni bagi organ ti ngasilka munyi jaku lalu tau dibagi lalu tau dibagi ngagai munyi vokal enggau munyi konsonan.

5)    Bertil Malmberg (1968), Manual of Phoetics

Mansik senentang unit ti diguna dalam leka jaku ke disebut orang. Lebuh ninga, pending napis munyi ti didingalalu untak uji ngelala nama bagi munyi ti didinga sereta mida ke munyi nya. Peninga bedau beratika reti munyi ti didinga tang nguji ngelala munyi nya.

6)    J,D O’Conor (1984), Phoetics

Munyi ti didinga diberi tukuh enggau fungsyen dalam raban bansa nya empu. Tukuh enggau fungsyen disempikut enggau utai ti deka dikenataika.

4.0        Organ artikulasyen

Iya nya organ ti ulih ngeluarka munyi jaku lalu mayuh organ ti bekaul enggau ngasilka munyi jaku. Sebengkah bagi organ ti bekaul maya ngasilka munyi jaku nya ulih dibagi ngagai tiga bengkah iya nya.

1)    Organ bagi dalam tubuh mensia

Bagi organ dalam tubuh nya meh keterubah iya ngasilka angin ti pansut baka ari lempuang, batang rekung, pita sura nyawa, peti sura nyawa, rumbang nyawa enggau rumbang rekung. Lalu di baruh tu bagi organ dalam tubuh ti ngasilka munyi lalu guna iya mega.

ORGAN- ORGAN TI NGASILKA MUNYI JAKU
1)    Lempuang	Nyedut angin enggau ngepam angin pansut lalu ngasilka munyi jaku.
2)    Batang rekung	Batang rekung ba entara rumbang angin enggau lempuang. Angin ti pansut ari lempuang dimanipulasyen organ enggau palan artikulasyen kena mansutka munyi.
3)    Rumbang nyawa	Organ ti bisi enggau maya ti ngasilka munyi jaku.
4)    Pita sura nyawa	Bisi dua iti tisu nipis ti dikumbai pita sura nyawa. Jarak ba entara pita sura nyawa nya bisi glotis lalu nya ngasilka munyi.
5)    Peti sura nyawa	Ngasilka munyi- munyi jaku nitihka endur iya.
6)    Rumbang rekung	Nyambung rumbang nyawa enggau bagi atas rumbang tekak, anak tekak enggau rumbang idung.

2)    Organ- organ artikulasyen

Organ artikulasyen iya nya organ ti dikena maya ti ngasika munyi jaku. Entara bagi organ tu iya nya baka, mulut atas enggau baruh, dilah mua, ujung enggau belakang, gusi, kelekanit kering, kelekanit lemi enggau pita sura nyawa, semua organ nya tadi dibagi ngagai dua bengkah iya nya organ artikulasyen aktif enggau pasif.

Organ artikulasyen aktif Ø  Organ ti ulih engkebut maya ti ngasilka munyi jaku.	Organ artikulasyen pasif Ø  Organ ti enda ulih engkebut maya ti ngasilka munyi jaku.
1)    Mulut atas enggau baruh. Ulih negu pangan diri tauka mulut atas negu ngeli tauka mulut baruh negu ngeli atas lalu ngasilka munyi.	a)    Ngeli atas
2)    Dilah mua, ujung enggau belakang. Dilah ujung ulih diengkebut ke mua tauka ke belakang, dilah mua ulih diangkat ke atas negu kelekanit kering lalu dilah belakang ulih diangkat negu kelekanit lemi.	b)    Kelekanit kering
3)    Ngeli. Ngeli baruh engkebut ke atas negu mulut atas.
4)    Kelekanit lemi Diberi ke baruh negu dilah belakang lalu meri munyi sengau.

3)    Palan artikulasyen

Palan artikulasyen iya nya endur ti bisi betegu enggau organ artikulasyen maya ti ngasilka munyi jaku. Mayuh munyi jaku ti ulih diasilka maya palan ti nyebut enggau endur ti nyebut nya dimanipulasyen. Penama munyi- munyi jaku ti diasilka nitihka chara munyi jaku nya ulih diasilka. Chunto iya baka, enti ujung dilah negu belakang atas gusi enggau kelekanit lemi lalu bisi mega negu rumbang belakang tekak lalu munyi ti diasilka [t]. Enti maya ngasilka munyi lalu bisi asai begetar, munyi nya diklasifikasyen munyi jaku. Kitai mega ulih ngengkah jari dalam pending lalu bejaku, kitai mega deka bisi ninga munyin ti meresih.

5.0        Munyi jaku

Ba komunikasyen, mensia ngasilka munyi- munyi jaku ti ulih diterima ba sesebengkah bansa. Munyi- munyi jaku tu disebut berintai tauka berurun lalu bisi mega ulih ditanda ngena kelai. Kelimpah ari munyi jaku, mensia mega ulih ngasilka munyi ti ukai jakutang ulih diperetika orang nama bagi pengawa iya nya.chunto munyi ti ukai jaku baka batuk, nyangir enggau ti bukai ti nadai ngembuan lambang. Dalam munyi jaku, bisi tiga iti munyi jaku ti bisi dikembuan kitai mensia.

6.1) Munyi vokal

Munyi ti diasilka ketegal nadai sebarang utai ti ngempang pejalai angin ba endur artikulasyen nya, munyi ti bisi didinga tauka ‘voiced’. Munyi vokal ulih dipeda ari mayuh bengkah chara baka gaya dilah lebuh nyebut leka jaku sereta nukangka mulut, urung dilah, tukuh mulut enggau buka rumbang nyawa. Kitai mensia bisi ngembuan beberapa bengkah vokal baka vokal mua, tengah enggau belakang.

5.1.1     Urup vokal dalam jaku iban

Nitihka sistem sepil ti dikeluarka Pusat Pengerembai Kurikulum taun 2007, netapka semua jaku iban tulin enda disepil ngena urup ‘o’. Sepil roh enggau orang agi ditanka laban nya jaku injau. Vokal a, e, i.o enggau u ulih bediri di mua, tengah enggau belakang leka jaku. Chunto leka jaku ari vokal a, “aram” (mua), “nadai” (tengah) enggau “naka” (belakang). Vokal e bisi dua bengkah munyi iya nya e pepet enggau e talling, e pepet semina ulih bediri ba mua enggau tengah aja baka “empai” (mua) enggau “kesai” (tengah).’e’ talling semina ayan ba belakang leka jaku baka “chire”. Vokal i ulih ayan ba mua, tengah enggau belakang leka jaku. Chunto iya “iti” (mua), “kira” (tengah) enggau “kemi” (belakang). Pia mega vokal o enggau u ulih bediri ba tiga iti endur nya.

5.1.2     Endur vokal

 

a)    Vokal mua

Organ atikulasyen baka dilah, pemesai rumbang nyawa enggau tukuh mulut. Palan artikulasyen iya nya kelekanit kering.

b)    Vokal mua sempit enggau setengah sempit

Mua dilah diangkat tang empai negu kelekanit kering. Kelekanit lemi enggau mua dilah diangkat ke belakang lalu nutup lubang idung. Peti sura nyawa dirapit awakka angin ngetarka iya. Rumbang nyawa tebuka, chunto mua sempit baka isu enggau siku, lalu chunto setengah sempit baka emas enggau kolej.

c)    Vokal mua setengah luas enggau luas

Mua dilah diangkat ngagai kelekanit kering, apin negu, baruh mimit ari vokal e. Ujung dilah terengkah ngagai gusi enggau ngeli baruh (setengah luas), chunto iya baka serai enggau besai. Bagi luas mua dilah diangkat mimit ngagai kelekanit kering. Kelekanit lemi enggau ujung dilah diangkat ke belakang batang rekung, chunto iya baka sabut enggau alai. Dua bengkah nya sama ngerapitka peti sura nyawa lalu rumbang nyawa dibuka.

d)    Vokal belakang

Ngena dilah enggau kelekanit lemi. Pemesai buka silak rumbang nyawa nentuka pemesai munyi vokal. Palan endur munyi nya didinga iya nya kelekanit kering.

e)    Vokal belakang  sempit enggau setengah sempit

Belakang dilah diangkat tang apin negu kelekanit kering. Kelekanit lenggau ujung dilah diangkat ke belakang rumbang rekung lalu nutup lubang idung. Peti sura nyawa dirapit awakka ulih ngetarka iya. Pintu rumbang nyawa segala, chunto (sempit) baka umai enggau buta, (setengah sempit) topik enggau koko.

f)     Vokal belakang setengah luas enggau luas

Belakang dilah diangkat tang apin negu kelekanit kering. Kelekanit lemi enggau batang rekung diangkat lalu nutup lubang idung. Peti sura nyawa dirapit awakka ulih ngasilka munyi ti begetar. Rumbang nyawa segala, chunto (setengah luas) orang enggau bol (luas) guna enggau gula.

g)    Vokal tengah pandak enggau panjai

Tengah dilah diangkat. Kelekanit lemi enggau batang rekung diangkat ke belakang rumbang rekung lalu nutup lubang idung. Peti sura nyawa dirapit awakka ngasilka munyi ti begetar. Rumbang nyawa segala chunto (tengah pandak) baka, enda enggau besai (tengah panjai) chire enggau lelese.

5.2  Munyi konsonan

Munyi ti diasilka lebuh pejalai angin tesekat,betelisih , bekindas tauka diempang siti ari organ artikulasyen baka mulut,gusi, kelekanit lemi enggau ti bukai. Bisi empat bengkah dikena kitai nentuka klasifikasyen munyi konsonan. Iya keterubah munyi begetar tauka enda siti- siti leka jaku ti diasilka. Palan ti ngasilka munyi, enti mulut ngasilka munyi dikumbai bilabial lalu enti dilah ngasilka munyi dikumbai alveolar. Iya ketiga chara sebut enggau bansa sekat, angin ti begumpul udah nya tesekat sebedau pansut ari palan artikulatori. Lalu iya ke penudi pejalai angin, arus pulmonik ngasilka munyi vokal enggau konsonan laban pejalai angin tama enggau pansut ari lempuang.

5.2.1     Urup konsonan

Jaku iban ngembuan dua puluh tiga urup konsonan.enam belas konsonan tulin b,d,g,h,j,k,l,m,,n,p,r,s,t,w,y enggau ng sereta ny.

5.2.2     Chara ngasilka munyi konsonan

a)    Letup dua mulut bemunyi [b] enggau [p]

Mulut atas enggau mulut baruh betemu, kelekanit lemi diangkat ngagai belakang rekung. Angin ti disekat ba belakang dua mulut dilepas tekala nya lalu ngasuh peti sura nyawa begetar [b], chunto iya baka munyi sebut bakul, kebab- kebab enggau ti bukai. Ba munyi [p], peti sura nyawa enda begetar, lalu chunto munyi iya baka panas, suap enggau ti bukai.

b)    Letup gusi bemunyi [d] enggau [t]

Ujung dilah diangkat rapit ngagai ngeli ngambika nyekat pejalai angin. Kelekanit lemi enggau batang rekung diangkat ke belakang lalu ngalit pejalai angin ngagai lubang idung. Ba bemunyi [d], peti sura nyawa dirapit lalu angin dilepas tekala nya, chunto iya baka tubuh, babut enggau ti bukai. Ba enda bemunyi, [t], peti sura nyawa dikendur lalu angin dilepas tekala nya, chunto iya baka tabin, bata enggau ti bukai.

c)    Letup kelekanit lemi bemunyi [g] enggau enda bemunyi [k]

Belakang dilah dirapit ngagai kelekanit lemi dikena nyekat pejalai angin. Kelekanit lemi enggau batang rekung diangkat ke belakang lalu nutup pejalai angin ke rumbang idung. Ba bemunyi [g]peti sura nyawa dirapit, begetar lalu angin dilepas tekala nya. Chunto iya baka gam, gusak enggau ti bukai. Ba enda bemunyi [k] peti sura nyawa ditendur, enda begetar lalu dilepas tekala nya baka munyi kayu, baka enggau ti bukai.

d)    Letup kelekanit kering gusi enda bemunyi [c] enggau enda bemunyi [j]

Mua dilah diangkat ngagai kelekanit kering lalu nyekat pejalai angin. Kelekanit lemi enggau batang diangkat ke belakang rumbang rekung. Ba enda bemunyi, peti sura nyawa dikendur lalu angin dilepas belubah- lubah. Chunto munyi iya baka chabut enggau bacha. Ba bemunyi peti sura nyawa dirapit lalu angin dilepas belubah- lubah, chunto iya baka jala enggau bala.

e)    Kindas gusi enda bemunyi [s]

Mua dilah diangkat ngagai gusi lalu nyekat pejalai angin.kelekanit lemi enggau batang rekung diangkat ke belakang rumbang rekung. Peti sura nyawa tendur lalu enda bemunyi, angin keluar nengah tekup dilah enggau gusi, chunto iya baka sabun enggau basu.

f)     Getar gusi bemunyi [r]

Mua dilah diangkat ke gusi lalu nyekat pejalai angin. Kelekanit lemi enggau batang rekung diangkat ke belakang. Peti sura nyawa dirapit lalu ngasilka munyi ti begetar, chunto iya baka rangka enggau bayar.

g)    Selipir gusi bemunyi [l]

Ujung dilah diangkat lalu nyekat pejalai angin,kelekanit lemi diangkat ke belakang. Peti sura nyawa dirapit lalu angin pansut nengah selipir dilah, chunto iya baka lampu enggau balak. Lalu mayuh agi chara bukai ngasilka munyi konsonan.

5.3  Munyi diftong

Datai ari munyi vokal. Kebuah pia laban diftong nya munyi dua iti vokal ti berimbai enggau pangan diri. Reti diftong nya nyadi asil ari munyi dua iti vokal ti berimbai. Jaku iban semina bisi ngembuan tiga leka diftong iya nya ai, au enggau ui ti diengkah ba ujung leka jaku. Diftong tu dimunyika sekali aja. Kesuah agi, munyi vokal ti keterubah iya disebut nyaris, panjai sereta lebih nyentuk agi, chunto iya baka makai, ukui enggau galau.

a)    Diftong au

Mulut kitai deka berubah ari gaya tebuka ngagai gaya segala enti nyebut diftong au tu. Ujung dilah diangkat semak ngagai ngeli baruh, mua dilah pan baruh lalu dilah deka jampat disintak dikena ngasilka munyi belakang tinggi, lalu dilah niku adap ngagai kelekanit kering. Batang rekung enggau kelekanit lemi diangkat awakka nutup pejalai angin, angin pansut nengah rumbang nyawa lalu ngasilka munyi vokal berimbai baka kerbau enggau langkau.

b)    Diftong oi/ui

Mulut berubah ari ti nuking mimit ngagai segala, belakang dilah diangkat tinggi. Dilah deka jampat dikeluarka sereta mua dilah diangkat ke kelekanit kering. Batang rekung enggau kelekanit lemi diangkat awakka nutup pejalai angin. Angin pansut nengah silak rumbang nyawa lalu ngasilka munyi oi baka boikot enggau dodoi.

c)    Diftong ai

Mulut kitai gaya ke tebuka, ujung dilah diangkat negu dilah baruh, mua dilah pan baruh. Dilah jampat dikeluarka. Angin pansut ari silak rumbang nyawa lalu ngasilka munyi vokal berimbai ai baka jalai enggau japai.

6.0  Bida munyi vokal rama enggau vokal glotis bepelasarka lagu iban

Lagu : Ngentuk ke mimpi                         Penanyi: Stella Phillip

Ransing ati ku bai kelalu tusah

Ai mata labuh nerutu

Maya nuan madah kebuah

Nuan empai ulih jadi enggau aku

Mimpi changka enggai enda dipenyadi

Nya kebuah ku ngalah kediri

Ngasuh nuan jadi enggau iya

Laban ku nuan enda lama

Ku jaku nuan suba

Mina ngentuk ke mimpi aja

Nuan ambai jadi enggau iya

Ku diasuh nganti setaun dua

Nganti nuan ngatur diri beserara enggau iya

Chukup lama aku udah nganti

Penuh tanda Tanya dalam ati

Kada nuan ngentuk ke mimpi

Anang aja nuan terus mungkir danji

Bida vokal rama enggau vokal glotis

Vokal rama	Vokal glottis
1)    Ati Ku bai kelalu	a)    Ai mata
2)    Maya	b)    Jadi
3)    Empai ulih	c)    Enggai enda dipenyadi
4)    Enggau aku	d)    Kediri
5)    Enggau iya	e)    Jadi
6)    Enda lama	f)     Ku jaku
7)    Mimpi aja	g)    Mina
8)    Dua	h)   Ambai jadi
9)    Beserara enggau iya	i)     Nganti
10) Kada	j)      Diri
11) Tanda tanya	k)    Danji