BIB1108

Definisyen semantik nitihka penemu bala Anda

1)    Stalnaker ( 1972:383)

Stalnaker tu madahka sintaksis nya mansik ayat lalu semantik mansik preposisi. Anda tu midaka pansik entara sintaksis enggau semantik. Anda tu mega bisi madahka penemu iya senentang semantik, iya madah semantik nya nerangka atur dikena ngaduka sereta meri ayat nya nyadi engkeman ba jaku enggau preposisi ti dipetungkaka maya ti bejuraika sesebengkah pekara maya ti berandau enggau pangan diri.

Nambahka nya mega, ari semua apak, atur nya sigi enda ulih meri ayat engkeman tekalanya enggau preposisi. Kebuah pia laban iya begunaka perengka bukai mega nyadika kereban sukung iya. Tang taja pia, enti deka meri ayat nya nyadi engkeman, preposisi ti bekaul enggau konteks ayat deka dikena ngambika nyadi siti ayat ti engkeman dipeda kitai.

Kelimpah ari nya, semantik mega siti ari batang pelajar ari atas preposisi lalu preposisi nya besangkut paut enggau vraie (betul) tauka faux (salah). Kebuah pia laban preposisi- preposisi tu bisi ngembuan rambai jaku.

Ulih disimpulka aku, pansik semantik iya nya senentang rambai jaku mega nitihka penemu Anda tu tadi. Iya mega madahka semantik nya semua pekara ti patut sereta engkeman nitihka konteks, situasyen, gaya utai ti dikerandauka tauka pekara ti dipejuraika maya ti betungkapka batang penemu orang ti berandau nya. Lalu tu nitihka penemu Stalnaker senentang semantik ti dipansik iya.

2)    Ogden enggau Richard

Nitihka penemu seduai iya, semantik iya nya siti bidang ti mansik sereta bejuraika makna jaku enggau ayat. Seduai iya meda semantik ari dua bengkah pekara tu aja iya nya jaku enggau ayat. Penemu seduai tu enda sama enggau penemu Stalnaker ti madahka semantik nya sebengkah pekara ti mansik preposisi.

Pia mega dalam bup seduai iya The meaning of meaning (1956), bisi meri enam belas iti reti enggau guna senentang reti. Dalam bup ti dikarang seduai iya nya, entara enam belas iti pekara ti dipejuraika seduai iya baka makna iya nya utai ti intrinsik, batang pekara, utai ti dikinginka sereta siti- siti pekara ti nyadi ti dikarapka nyadi bagi sesebengkah orang nya. Reti iya, iya ngarapka pekara nya nyadi dalam pengawa ti dikerejaka iya besari- sari dalam pengidup iya.

Kelimpah ari nya, seduai iya mega madahka leka jaku semantik tu agi baru dikena enti dibandingka enggau bidang ti ke bukai. Lalu tu nunjukka leka jaku semantik tu ukai pekara ti lama lalu dipejalaika pansik tang agi baru lalu pansik iya mega mayuh nitihka penemu orang ti bejalaika pansik senentang semantik tu. Lalu pia mega, enam belas pekara ti dirintaika seduai iya nya lalu dikena bala Anda ke bukai maya ti bejalaika pansik sida senentang semantik tu. Sida iya bisi belalauka bup seduai iya maya tin gaga pansik sida iya kediri empu.

Taja pia, bup seduai iya nya enda mansik enggau lenak bendar senentang semantik taja pan bisi bekaul, seduai iya enda ulih ngerintaika semua definisyen semantik enggau nyemetak bendar. Seduai iya semina bejuraika definisyen semantik senentang penemu seduai iya aja. Lalu pia mega, seduai iya enda ulih bejuraika semua makna lalu madahka semua nya ngembuan siti- siti pekara ti sama tauka enda sama. Bisi pansik ari Anda bukai ti mayuh agi ari seduai lalu enda sama nitihka penemu kediri empu.

Seduai iya mega bisi meri definisyen ke bukai senentang semantik tu. Seduai iya madahka rambai jaku enggau ayat ti ditemu kitai ngembuan makna ti sama. Lalu nya mih definisyen ke bukai ti bisi diberi seduai iya senentang semantik tu. Enggau nya kitai ulih meda semantik tu ngembuan mayuh definisyen ti enda sama nitihka bagi orang ti bejalaika pansik nya.

3)    Atmajian et.al. (1995:222)

Semantik dalam jaku ribai iya nya semantiks. Dalam bidang linguistik, semantik tu mansik makna dalam siti- siti jaku. Lalu pia mega semantik tu bisi datai ari leka jaku orang yunani iya nya ‘sema’. Sema tu ngemai reti tanda tauka lambang. Lalu enggau nya semantik tu mega ulih dikumbai kitai penemu ti mansik tanda- tanda tauka lambang- lambang. Tanda enggau lambang tu mih ngasilka siti jaku enggau reti iya enggau engkeman sereta lenak diperatika kitai semua.

Kelimpah ari nya, sepil semantik bukai ti ulih dipeda kitai iya nya baka semiotic, semilogi enggau semasiologi. Semua tiga bengkah pekara nya tadi semina betungkapka siti pekara aja iya nya semantik. Lalu enggau nya kitai ulih meda semantik tu bisi mayuh bidang ti ke bukai.

Lalu pia mega, nitihka semantik jaku ulih dipeda kitai ari raban ayat, lalu ayat digaga ari rintai jaku. Semantik tu mega ulih diperatika kitai ari pansik senentang makna morfem, kata, rambai jaku sereta ayat dalam siti- siti jaku ti dikena kitai  maya ti bejaku enggau pangan diri.

Nitihka penemu Atmajian, iya madahka dalam bidang linguistik, semantik tu ngemai reti pansik senentang makna enggau jaku. Semantik bekaul enggau unit linguistik sereta atur iya ti bejantil enggau pangan diri.

Dalam bidang pemendar, semantik tu dipeda tauka diperatika nyadi pansik senentang sanding linguistic tauka denotasi enggau atur pemendar. Pansik semantik ulih digaga ari tikas jaku tauka ba tikas ti pemadu tinggi. Tikas ti pemadu tinggi iya nya utai ti nyadi ari rambai jaku enggau ayat.

Nambahka nya, fakta semantik iya nya penemu tauka bagi ti ke beguna dalam jalai jaku. Kebuah jalai jaku beguna laban jalai jaku nya dikena bejuraika siti- siti pekara maya ti bejaku. Enti kitai nadai ngena jalai jaku enggau engkeman, pekara ti deka dipejuraika kitai nya enda ulih dipejuraika enggau manah sereta engkeman nitihka atur iya ke bendar. Nya kebuah kitai patut ngena jalai jaku ti betul maya ti betungkapka siti- siti pekara ngambika nyamai sereta nyemetak didinga.

Anda tu mega bisi meri definisyen ke bukai senentang semantik tu. Iya madahka semantik tu mega pansik senentang lambing tauka tanda ti bejuraika makna, kaul entara makna enggau makna ke bukai sereta guna makna enggau orang ti enggau kitai bejaku. Enti nadai makna tauka kebuah kitai bejaku, kitai semina bejaku sengapa aja tauka nadai tuju. Kebuah kitai deka bejaku laban bisi utai ti deka dikenataika kitai ngagai orang bukai.

Lalu disimpulka aku, penemu Anda tu iya nya pansik semantik senentang makna. Definisyen iya senentang semantik iya nya bejuraika makna. Makna bisi jurai ke bukai mega nitihka penemu iya.

  

4)    Siti Hajar Abdul Aziz (2009)

Semantik tu datai ari leka jaku Greek iya nya semantikos. Reti leka jaku nya iya nya meri reti ngagai tanda, siti- siti pengawa tauka tanda tauka siti- siti utai tauka batang pekara ti bisi ngemai reti. Semantik tu mega bisi datai ari leka jaku bukai. Leka jaku bukai semantik tu nitihka penemu Anda tu iya nya ari leka jaku semayang. Leka jaku semayang tu nunjukka ngagai apak reti tauka maksud. Reti bagi leka jaku nya iya nya reti baka utai ti disebut ba siti- siti jaku tauka sistem tanda ti ke bukai ti bisi dikena kitai maya ti bejaku tauka betungkapka siti- siti batang pekara.

Kelimpah ari nya, Anda tu mega madahka semantik tu ari jaku ribai iya nya meaning, mean, meant enggau means. Semua nya tadi ngembuan siti reti ti sama aja iya nya makna. Semua nya mega nunjukka ngagai reti tauka maksud ti ulih dikena kitai ba mayuh bengkah situasyen ba pengidup kitai besari- sari maya ti ngenataika sesebengkah jaku tauka buah runding ngagai orang bukai.

Nambahka nya leka jaku semantik ke dikena kitai kemaya hari diatu iya nya datai ari leka jaku perancis lalu dikumbai kitai semantique. Leka jaku semantique tu udah dikena Michael Breal aria bad ke- 19 dulu suba. Iya udah ngena leka jaku nya maya ti bejalaika pansik iya senentang semantik ti dipelajarka kitai kemaya hari diatu. Lalu tu nunjukka leka jaku tu datai ari mayuh menua nitihka orang ti landik bejalaika pansik senentang semantik tu maya nya suba.

Lalu pia mega, nitihka Anda tu semantik tu bebida ari sintaksis. Kebuah iya nyadi baka nya laban semantik tu makna, tang sintaksis mansik tukuh siti- siti bagi sistem tanda. Anda tu mega madahka, semantik nya mega mansik makna dalam linguistic. Semantik tu siti ari jalai jaku ti pedis diperatika laban bekaul enggau utai ti nyata ba dunya tu. Orang ti mansik nya patut nemu meri kaul ngagai semantik enggau pekara ti nyata.

Enggau tu mega, semantik nya mega pansik linguistic ti bejuraika makna ti manah ba tikas morfem, jaku, rambai jaku, ayat tauka wachana. Semua tikas nya tadi dipejuraika ari apak reti, runding tauka konsep ti ulih dipindah ari runding orang ke bejaku ngagai runding orang ti ninga orang ti bejaku nya tadi. Semua pengawa nya tadi nyadi ba semantik. Makna utai ti disebut tauka jaku ukai dipeda ari makna aja, tang mega ari apak bukai baka entak sebut, gaya bejaku, tuju bejaku, orang ti bejaku, orang ti ninga enggau buah runding ti dipejuraika orang nya maya sida iya bejaku enggau pangan diri.

5)    Ferdinand De Saussure

Leka jaku semantik tu datai ari leka jaku adjektif orang yunani iya nya semantikkos. Lalu semantikos tu ngemai reti ‘beguna’. Lalu pia mega lekaj jaku ‘beguna’ nya mega bisi ngembuan reti iya kediri empu. Reti leka jaku ‘beguna’ nya iya nya makna ti beguna. Semua ba atas nya tadi mih reti leka jaku semantik nitihka jaku adjektif ari orang yunani.

Nitihka Anda tu iya nya Ferdinand De Saussure, semantik iya nya jaku ti disebut ti dikena maya ti ngenataika reti tauka makna maya ti benung bejaku enggau orang bukai. Anda tu madahka, tiap- tiap tanda bisi ngembuan dua iti tauka dua bengkah penteba. Iya ti keterubah iya nya signifie tauka signified. Reti bagi penteba ti keterubah tu iya nya ditanda. Dalam signifie tu, iya ke ditanda ngemai reti konsep tauka makna siti- siti tanda tauka lambing. Ambika chunto, maya kitai nyebut leka jaku manuk. Lalu signifie tauka tanda ti ulih dipelabaka kitai iya nya manuk nya sebengkah ari bansa jelu, empat iti kaki lalu penteba iya ke bukai. Maya kitai ti nyebut manuk nya tadi, untak kitai deka berunding ke gamal tauka tukuh bansa jelu manuk nya tadi. Nya mih ti dikumbai kitai signifie tauka tanda tauka lambing.

Iya ti kedua iya nya signifian tauka signifier. Reti iya nya utai ti ditandaka. Lalu tu ngemai reti munyi jaku ti diterima orang ke enggau siku- siku orang nya bejaku. Chunto iya nya baka, kitai udah nemu bakani tukuh enggau penteba ti bisi ba manuk nitihka utai ti udah dibantaika ba keterubah tadi iya nya signifie. Pengudah kitai nemu tukuh enggau penteba iya, kitai deka empai nemu enggau lenak agi lalu kitai deka ngemunyika iya manuk nitihka signifian tu. Munyi ti disebut kitai nya tadi lalu ditulis kitai baka m,a,n,u,k lalu dimunyika kitai nyadi manuk. Nya tadi mih konsep semantik ti diberi Anda kitai tu.

Ulih disimpulka aku, semantik tu lalu dikumbai sebagi ari linguistik ti mansik siti- siti jaku enggau lenak sereta nyemetak agi ngambika nyamai diperatika kitai semua. Semantik tu ulih diperatika kitai baka siti bidang ti mansik makna tauka reti leka jaku enggau ayat dalam leka jaku enggau pandak , muntang sereta nyamai diperatika kitai semua ti enggau maya ti bejuraika sesebengkah pekara ti dipetungkapka.

Ulih dipeda kitai mega ari sukut denotasi enggau konotasi, makna ari apak kaul reti enggau adat, ubah reti enggau tukuh reti ari sukut tauka kaul  semantik. Dalam jaku melayu, bisi ngembuan mayuh bengkah reti ti ulih dibagi kitai nitihka penteba iya kediri empu baka sinonim, hiponim, antonim enggau utai ti bukai ti besangkut paut enggau iya dalam semantik tu.

6)    Sperber enggau Wilson (1980)

Semantik iya nya bidang ti mansik sereta nisih makna kata enggau ayat. Tu nitihka penemu seduai iya senentang definisyen semantik tu. Kata tauka unit ti dikena maya ti bejaku ti nadai ngembuan sekat lalu iya bisi ngembuan tauka ngundan makna iya kediri empu ti chukup beguna maya ti ngenataika jaku tauka buah runding ngagai orang bukai. Nitihka penemu seduai iya, dalam jaku kitai ulih ngenataika buah runding, penemu, geragayak ati, pengawa ti digaga tauka dikerejaka kitai sereta penteba ke bukai ti digaga kitai mensia besari- sari dalam pengidup kitai kamaya hari diatu.

Kelimpah ari nya, pekara ti bekaul rapat enggau semantik iya nya baka semistik, semiologi enggau semasiologi. Semua nya tadi bisi ngembuan penteba iya kediri empu dalam semantik. Nitihka penemu anda tu mega, seduai iya mega bisi madahka semantik tu sistem ti penuh. Seduai iya segulai penemu madahka ba situasyenti nyata tauka segenda lalu madahka tauka bejuraika konsep semantik tu enda ulih diayanka makna iya ti ke bendar.

Pekara nya ngemai reti, pekara ti dikenataika tauka dipejuraika nadai ngambi kaul ari aspek konteks enggau kontekstualiti. Tang taja pia, pekara ti dikemeratka seduai iya dalam pansik senentang semantik tu iya nya, tukuh pemendar ti ulih ngasilka sebagi ari nahu siti- siti jaku.

Lalu tu nunjukka semantik tu mansik makna ari apak guna iya ba tikas linguistic ti chulin. Lalu pia mega, enggau leka jaku bukai pansik semantik tu rat agi ba tikas jalai jaku enggau nahu ari apak tukuh pemendar aja nitihka penemu Sperber enggau Wilson tu dalam pansik semantik seduai iya.

 Definisyem semantik nitihka Anda  Ferdinand De Saussure

Chunto semantik nitihka Anda tu iya nya baka enti kitai nyebut leka jaku rumah. Pekara ti deka dipejuraika tauka dipetungkapka kitai iya nya bekaul enggau sebansa utai ti dikumbai rumah. Pengudah kitai nyebut leka jaku rumah nya tadi, untak kitai deka beratika gaya rumah nya tadi. Ba kerubung untak kitai bisi meda ayas rumah ti udah disebut nya tadi. Kelimpah ti ari belematika ba untak, kitai mega ulih ngelukis nama bagi utai rumah ti dipelaba ditemu kitai. Pekara ti dilukis enggau diperatika kitai nya tadi dikumbai kitai tanda nitihka Ferdinand De Saussure.

Pengudah ti ngelukis sereta belematika ari untak, udah nya kitai deka meda bagi signifie tauka signified ( konsep tauka makna) tauka mega reti. Kitai deka nulis bagi penteba rumah ti ditemu kitai. Kitai nemu rumah nya endur diau, bisi mayuh bengkah rumah baka rumah panjai, rumah setingkat, rumah dua tingkat enggau mayuh agi bansa rumah, kitai mega nemu rumah tu digaga orang ngena mayuh bengkah perengka baka ari kayu, semin, batu, pasir enggau utai bukai. Pengudah ti nulis semua penteba rumah ti ditemu kitai nya tadi, untak kitai deka terang agi belematika bansa utai ti dikumbai rumah nya tadi.

Lalu pia mega, enggau belematika lenak agi nama bagi utai ti dikumbai rumah, udah nya kitai deka meda ari apak signifan tauka signifier (bunyi) tauka munyi. Kitai nemu semua bagi penteba rumah nya tadi, tang penemu kitai nya empai chukup enti bedau ngenataika munyi bagi rumah nya. Taja pan kitai ulih nulis semua penteba rumah tang enti enda dimunyika kitai deka enda nemu nama bagi utai ti deka dikenataika nya. Lalu kitai ngemunyika rumah nya baka tu iya nya r,u,m,a,h lalu nyebut iya rumah. Pengudah nya, untak kitai deka terang bendar nemu nama bagi utai ti dikumbai rumah nya tadi.

Semua nya tadi mih chunto bagi semantik ari Anda kitai tu iya nya Ferdinand De Saussure.

 SEMANTIK

Ngaraka definisyen semantik

I.      Yunani- (sema) tanda tauka kelai (jaku nama).

II.    Jaku pengawa Yunani (semiano)- nanda tauka ngelai.

III.   Semantickos (jaku adjektif Yunani) (Hashim Musa, Ong Chin Guan 1998)- beguna tauka ngembuan reti.

IV.  J.W.M.Verhar, 1996- pampang linguistik ti bejuraika reti.

V.   Abdul Chaer, 1994- pampang pelajar linguistik ti mansik reti jaku.

VI.  Kamus dewan 1997:1228- reti leka jaku enggau ngenambahka reti leka jaku.

VII. Semantik (raup)- penemu senentang reti tauka ubah reti siti- siti leka jaku.

VIII. Abdullah Hassan- pampang penemu senentang pansik tauka jurai reti ti disebakaka. (reti ti sama baka macha).

IX.  Zulkifli Hamid- pampang penemu linguistik ti meri fokus ngagai pansik reti ba tikas leka jaku, rambai jaku, klausa enggau ayat.

X.   Nik Safiah Karim- mansik reti tauka reti dalam jaku.

XI.  Kamaruddin Hj. Husin- pansik senentang reti linguistic ke bekenangka aspek ke dipandangka ba ayat tauka objek.

XII. Ferdinand De Saussure

tanda

Signifie /signified (konsep tauka makna) Reti

Signifian / signifier ( bunyi) munyi

 

v  Genap tanda linguistik ngembuan komponen signifian (ti ngenataika reti) dipandangka ngena munyi enggau komponen signifie ( ke diberi reti) mandangka konsep tauka reti ( signifian).

v  Reti iya nya “konsep” tanda linguistik.

Definisyen semantik

Definisyen rama semantik

Dalam penemu rama, semantik nya datai ari jaku ribai iya nya semantics. Lalu bisi mega ti madahka semantik nya datai ari leka jaku orang bansa Yunani iya nya semantickos ti ngemai reti beguna tauka bisi ngembuan reti iya kediri empu.

Ari apak linguistik, sida iya madahka semantik nya pansik senentang reti dalam sesebengkah jaku enda milih nya jaku melayu, cina, iban enggau mega jaku raban bansa bukai mega. Semantik mega bisi datai ari jaku Yunani iya nya sema ti ngemai reti tanda tauka kelai. Kitai mega ulih meda semantik tu diberi reti penemu ti mansik jalai tanda tauka kelai ti diasilka kitai ari jaku sereta reti ti dikenataika kitai nya.

Kelimpah ari nya, semantik tu mega ulih dikumbai kitai pansik senentang reti morfem, jaku, rambai jaku, enggau leka jaku dalam sesebengkah jaku raban bansa. Leka jaku semantik mega ulih dipeda kitai ke bukai baka semiotic, semilogi enggau semasiologi. Semua nya tadi seperugan enggau leka jaku semantik.

Semantik tu mega pampang ti mansik sereta bejuraika senentang reti enggau leka jaku lalu beratika senentang jurai reti enggau lenak agi. Semantik tu beratika kelai tauka tanda ti nerangka reti, kaul reti enggau reti ti bukai sereta parit iya ngagai sesebengkah komiti. Ulih disimpulka ditu, semantik iya nya penemu senentang reti enggau ubah reti ngagai sesebengkah leka jaku.

Nitihka penemu tebangkar

Tebangkar ti keterubah iya nya Stalnaker ( 1972:383), ti madahka semantik nya pansik senentang preposisi. Iya madahka semantik nya nerangka atur dikena ngaduka sereta meri ayat nya nyadi engkeman ba jaku enggau preposisi ti dipetungkaka maya ti bejuraika sesebengkah pekara maya ti berandau enggau pangan diri. semantik mega siti ari batang pelajar ari atas preposisi lalu preposisi nya besangkut paut enggau vraie (betul) tauka faux (salah). Kebuah pia laban preposisi- preposisi tu bisi ngembuan rambai jaku.

Tebangkar ti kedua iya nya Ogden enggau Richard ti madahka semantik nya siti bidang ti mansik sereta bejuraika makna jaku enggau ayat. Seduai iya meda semantik ari dua bengkah pekara tu aja iya nya jaku enggau ayat. bup seduai iya The meaning of meaning (1956), bisi meri enam belas iti reti enggau guna senentang reti. Dalam bup ti dikarang seduai iya nya, entara enam belas iti pekara ti dipejuraika seduai iya baka makna iya nya utai ti intrinsik, batang pekara, utai ti dikinginka sereta siti- siti pekara ti nyadi ti dikarapka nyadi bagi sesebengkah orang nya.

Tebangkar ti ketiga ti bisi mansik senentang semantik tu iya nya Siti Hajar Abdul Aziz (2009) ti bejuraika reti semantik nya Reti leka jaku nya iya nya meri reti ngagai tanda, siti- siti pengawa tauka tanda tauka siti- siti utai tauka batang pekara ti bisi ngemai reti. Leka jaku bukai semantik tu nitihka penemu Anda tu iya nya ari leka jaku semayang. Leka jaku semayang tu nunjukka ngagai apak reti tauka maksud. Reti bagi leka jaku nya iya nya reti baka utai ti disebut ba siti- siti jaku tauka sistem tanda ti ke bukai ti bisi dikena kitai maya ti bejaku tauka betungkapka siti- siti batang pekara.

Lalu pia mega nitihka tebangkar tu, semantik tu bebida ari sintaksis. Kebuah iya nyadi baka nya laban semantik tu reti, tang sintaksis mansik tukuh siti- siti bagi sistem tanda. Semantik tu siti ari jalai jaku ti pedis diperatika laban bekaul enggau utai ti nyata ba dunya tu. Orang ti mansik nya patut nemu meri kaul ngagai semantik enggau pekara ti nyata.

Penemu tebangkar ti keempat iya nya Ferdinand De Saussure ti madahka pansik iya senentang semantik iya nya jaku ti disebut ti dikena maya ti ngenataika reti tauka makna maya ti benung bejaku enggau orang bukai. Tebangkar tu madahka, tiap- tiap tanda bisi ngembuan dua iti tauka dua bengkah penteba.

keterubah iya nya signifie tauka signified. Reti bagi penteba ti keterubah tu iya nya ditanda. Dalam signifie tu, iya ke ditanda ngemai reti konsep tauka makna siti- siti tanda tauka lambing. Ambika chunto, maya kitai nyebut leka jaku manuk. Lalu signifie tauka tanda ti ulih dipelabaka kitai iya nya manuk nya sebengkah ari bansa jelu, empat iti kaki lalu penteba iya ke bukai. Maya kitai ti nyebut manuk nya tadi, untak kitai deka berunding ke gamal tauka tukuh bansa jelu manuk nya tadi.

kedua iya nya signifian tauka signifier. Reti iya nya utai ti ditandaka. Lalu tu ngemai reti munyi jaku ti diterima orang ke enggau siku- siku orang nya bejaku. Chunto iya nya baka, kitai udah nemu bakani tukuh enggau penteba ti bisi ba manuk nitihka utai ti udah dibantaika ba keterubah tadi iya nya signifie. Pengudah kitai nemu tukuh enggau penteba iya, kitai deka empai nemu enggau lenak agi lalu kitai deka ngemunyika iya manuk nitihka signifian tu. Munyi ti disebut kitai nya tadi lalu ditulis kitai baka m,a,n,u,k lalu dimunyika kitai nyadi manuk.

Lalu penemu tebangkar ti kepenudi iya nya Suwandi (2008:9) ti madahka penemu iya senentang semantik iya nya pansik tanda tauka kelai lalu madahka kaul reti enggau reti iya ti bukai lalu empas iya ngagai pengidup kitai. Lalu tebangkar tu nyimpulka semantik tu ngeraup reti jaku, pengerembai leka jaku lalu ubah jaku nya ngagai aspek kitai ngena leka jaku semantik nya tadi.

Semua ke udah dirintaika ba atas nya tadi mih penemu bala tebangkar senentang semantik tu. Ari simpul penemu aku, bala tebangkar tu madahka semantik nya ngemai reti tanda tauka kelai. Reti, tanda tauka kelai nya tadi ngembuan pekara ti ke beguna dikena maya kitai berkomunikasyen. Lalu nya tadi raup penemu bala sida tebangkar senentang semantik.

Definisyen struktur reti

Semantik iya nya pansik reti dalam pampang linguistik lalu reti nya buah runding tauka  konsep ti ulih dipindahka ari runding orang ke bejaku ngagai orang ke ninga. Reti nya ngemai penemu ti chukup besai, ambika chunto baka leka jaku iya, ti ulih ngemai mayuh reti baka orang laki, orang indu, orang tuai enggau ti bukai. Tau mega kitai melabaka leka jaku iya nya nunjuk ngagai pengawa ti dikereja siku- siku orang nya, ambika chunto baka iya makai, iya tinduk, iya mandi enggau ti bukai.

Lalu struktur iya nya siti chara ti nyatupka bagi ti ke mit sampaika genap, baka tubuh kitai mensia ti nyadi ari mayuh begian ti ke mit. Ari apak struktur reti, iya nunjuk ngagai baka ni siti- siti leka jaku nya ulih ngasilka ayat ti meri reti ayat nya enggau penuh sereta genap.

Dalam reti jaku bukai, iya disebut semantik struktural, iya nya nunjuk ngagai kaul entara reti leka jaku dalam sesebengkah ayat lalu baka ni reti nya ulih diasilka. Kitai mega deka beratika struktur reti ayat. Ambika chunto baka maya kitai bejaku ti bisi ngena 'kata nafi', kitai ulih ngasilka dua ayat ti enda sama. Ambika chunto baka, Sali nya mayau ti betul lalu Sali nya ukai mayau ti salah. Enti dua preposisi baka nya, kitai ulih madahka nya salah lalu semua nemu bisi leka jaku ti begulai tang enda sama baka indu laki, tinggi baruh, manah jai enggau leka jaku ti bukai.

Ulih disimpulka aku ditu, struktur reti nya ulih ngemai interpretasi ti enda sama tauka penemu nya enda sebaka. Kebuah pia laban iya nitihka guna iya dalam leka jaku enggau ayat iya kediri empu. Struktur reti tu ulih ngempung semua pekara ti dikumbai kitai jaku tauka leka jaku.

Bansa struktur reti

Sinonim

Reti sinonim tu iya nya dua tauka lebih leka jaku ti ngemai reti ti sama. Ambika chunto baka leka jaku muntang enggau senang, jai enggau rusak. Lalu chunto iya ti dikena ba dalam ayat iya nya baka bajik amat gamal Endun, mua iya manah amat dipeda. Leka jaku sinonim ti bisi ba leka jaku nya iya nya bajik enggau manah.

Antonim

Reti antonim tu iya nya leka jaku ti ngemai reti ti belaban tauka enda sama reti ba leka jaku nya. Lalu chunto ba leka jaku antonim tu iya nya baka gemu kurus, pandak tinggi, manah jai enggau chunto ti ke bukai mega. Kitai mega ulih meda chunto antonim ba leka jaku iya nya besai amat tubuh Dina tang tubuh Dini mit amat. Leka jaku antonim bisi ba dia iya nya besai enggau mit.

Polisem

Lalu polisem tu iya nya siti leka jaku ti ngemai mayuh reti ti enda sama. Reti iya siti leka jaku nya ulih meri reti leka jaku ti ke bukai. Ambika chunto baka leka jaku jai. Kitai ulih ngena leka jaku jai nya nunjuk ngagai orang ti ngembuan ulah ti enda manah. Reti ti ke bukai ba leka jaku jai tu iya nya utai ti udah jai tauka enda manah agi baka rumah nya enda manah, utai diempa ti udah jai tauka utai bukai mega.

Hiponim

Hiponim tu jaku tauka rambai jaku lalu reti nya tadi digempung tauka disempulangka sekali. Chunto ba hiponim tu iya nya baka leka jaku buah ti ulih mungkur semua bansa buah. Ambika chunto iya ba leka jaku baka 'mayuh amat bansa buah ba kebun aki, baka buah rian, dabai, sikup, empelam, kemanti enggau mega buah ti ke bukai. Semua bansa buah nya tadi ulih digempung dalam leka jaku buah nya.

Homonim

Definisyen bagi struktur reti ba homonim tu iya nya leka jaku ti sama sepil enggau munyi tang bebida ari reti iya. Ambika chunto ba homonim tu iya nya baka leka jaku mansang. Entara reti ba leka jaku mansang tu baka orang mansang ke mua, ai ti mansang, pengidup kitai ti majak mansang enggau mega chunto bukai ti besangkut paut enggau leka jaku mansang tu.

Homofon

Lalu ba leka jaku homofon tu iya ngemai reti leka jaku ti sama munyi tang bebida ari sepil enggau reti iya. Munyi iya aja sama tang sepil enggau reti iya enda sama enti ba dalam homofon tu. Ambika chunto baka leka jaku duit enggau duet, chara kitai nyebut iya nya deka sebaka tang enda sama reti ba dua bengkah leka jaku nya. Leka jaku duit nya ngemai reti utai ti dikena kitai bebayar. Lalu reti duet iya nya orang ti belagu dua iku sekali lalu dikumbai kitai beduet.

Homograf

Bansa struktur reti ti kepenudi iya nya homograf ti ngemai reti, leka jaku ti sama sepil tang bebida ari munyi enggau reti iya. Ba jaku iban, nadai mayuh leka jaku ti bisi penteba ke baka tu ti bisi dikena kitai. Chunto senentang homograf tu iya nya baka raga enggau raga'. Dua iti leka jaku nya tadi sama sepil tang reti enggau munyi iya enda sebaka. Bagi ti keterubah raga iya nya perengka ti dikena kitai ngengkah barang baka kena ngengkah ikan maya kitai nginti. Lalu reti raga ti kedua iya nya enti dimunyika bisi munyi glotis ba belakang iya. Raga ti kedua tu iya nya kena kitai belalau bejalai ba tanju rumah tauka utai ti digaga ke lalau ba rumah kelebih agi ba tanju.

  

Bansa struktur reti

Bansa struktur reti	Reti	Chunto leka jaku	Chunto ayat
a)    Sinonim	Leka jaku ti ngemai reti ti sama.	1)    Nuan- Dik 2)    Semak - Damping	1)    Bajik amat gamal endun, mua iya manah amat dipeda
b)    Antonim	Leka jaku ti ngemai reti ti belaban.	1)    Gemu- Kurus 2)    Pandak- Tinggi	1)    Gemu amat Endun, tang sapit iya kurus.
c)    Polisem	Siti leka jaku ti ngemai mayuh reti ti enda sama.	1)    Buruk 2)    Sayau	-       Buruk amat indu nya gawa. -       Nyau udah buruk buah      nya.
d)    Hiponim	Jaku tauka rambai jaku lalu reti iya digempung.	1)    Ikan- semah, baung, empurau, sakam etb.	1)    Mayuh amat jelu ti diulih sida baka babi, rusa, kijang, etb. ( semua nya sebansa ari jelu)
e)    Homonim	Lekajaku ti sama sepil enggau munyi tang bebida ari reti iya.	1)    Mansang	-       Anembiak nya mansang ke mua laban dikangau ke pengajar iya. -       Ai nya mansang ngenyit.
f)     Homofon	Leka jaku ti sama munyi tang bebida ari sepil enggau reti iya.	1)    Duit 2)    Duet	1)    Indai meri aku duit Rm 1 ke belanja aku di sekula. 2)    Ricky belagu duet enggau Sima ba pengerami nya.
g)    Homograf	Leka jaku ti sama sepil,tang bebida ari munyi enggau reti iya.	1)    Baka 2)    Baka '	1)    Mua Endun manah amat dipeda baka mua penanyi nya. 2)    Indai nyimpan ikan ba baka' ti dibai iya.

Definisyen gentilang reti

Gentilang reti iya nya raban leka jaku ke ngembuan kaul enggau pangan diri ketegal ti ayan ba konteks ti sama. Nitihka Abdullah Hassan, semua leka jaku ke bekaul enggau universiti nya tadi dipasukka nyadi gentilang reti bagi universiti. Pengudah kitai ninga leka jaku universiti, kitai ulih nyagam nama uti ti bisi ba universiti baka kereja kus, bilik endur belajar, pengelicha, bup,buding enggau ti bukai ti bisi ba universiti.

Kelimpah ari nya, gentilang reti nya seraban bansa leksikal ke ngembuan reti ti besangkut paut laban leka jaku nya dikenataika nengah konteks ti sebaka, lalu dalam gempung ke sama.

1.1.1     leka jaku

Reti leka jaku mega dikumbai reti leksikal lalu disebut semantik leksikal ti nunjukka pansik senentang utai ti deka dikenataika. Ambika chunto baka 'apai lalu ke pasar', leka jaku ke nya nunjukka utai ti deka dipadahka. Leka jaku ke nya enda ulih diganti enggau leka jaku ti bukai tang apai, lalu enggau pasar nya ulih diganti enggau leka jaku ti bukai.

Leka jaku nya mega ulih dikena kitai meri reti ngagi sesebengkah pekara lalu ari linguistik iya dikumbai unit leksikal. Nitihka Bloomfield (1933:178), madahka leka jaku nya siti tukuh ti nadai ngembuan sekat tauka bebas,nadai pengentap senentang penyampau unit semantik ti ulih dipeda dalam leka jaku. Leka jaku mega ulih dibagi ngagai beberapa bengkah baka:

Reti denotasyen

Iya nya reti leka jaku iya empu, tauka reti be diksyenari. Ambika chunto baka rumah lalu untak kitai deka meda rumah nya utai endur kitai tinggal lalu dalam rumah nya bisi bilik besai, bilik mandi, bilik agu enggau ti bukai. Semua nya pekara ti besangkut paut enggau rumah. Reti denotasyen nya reti ti ulih diterima semua orang lalu bisi kereban sanding ti bukai ke sama. Ambika chunto baka, reti denotasyen ba jelu siga iya nya sebansa utai ti beseput tang nadai ngembuan pengelandik bepikir ( kamus linguistik, 1997). Enggau tu, denotasyen tu ngemai reti ulih dipeda lalu ngemai reti ti terus.

Reti konotasyen

Iya nya reti ke dilalaika tauka dikelaungka lalu iya mega dikumbai reti emotif tauka evaluatif. Ambika chunto baka gerah mata undang ti ngemai reti 'gaya peda mudah diulih, tang enti dikereja pedis bendar. Reti konotasyen tu nunjuk ngagai reti ti enda ulih dipeda enggau terus. Reti tu mega bisi sangkut paut enggau sesebengkah raban bansa bansa, baka chura mirah ba daya idup orang bansa  cina iya nya pengaga.

Kaul reti enggau daya idup

Tu ngemai reti chara tauka maya ke patut alai kitai ngena sekeda leka jaku, lalu tu dikumbai bekaul enggau daya idup sesebengkah raban bansa. Ambika chunto baka ba daya idup kitai raban bansa iban, kitai deka ngagauka orang laki nya aya enti iya tuai agi ari kitai tauka mega serambau enggau apai kitai.

Gentilang reti ayat

Reti ayat bepanggai ba reti leka jaku ti bisi dikena dalam nya lalu bakani iya dipegulaika. Bisi kaul semantik ti bisi kitai dalam ayat, ambika chunto baka dua leka jaku ti sama reti dikumbai bisi kaul sinonim. Chunto iya baka ayat tu, aka belajar ba Universiti Islam Antabangsa, endur aka belajar ba Universiti Islam Antabangsa. Penteba gentilangreti ayat ke bukai baka:

Konotasyen

Konotasyen tu iya nya reti ke ditulis bebida enggau reti ke disebut, kebuah pekara tu nyadi laban pengingin ati deka ngenataika siti- siti pekara ti ngembuan reti ti bebida, lalu iya mega ngembuan biuh ngagai siti- siti komunikasyen. Ambika chunto baka, bagas amat nuan tu gawa Jang. Dalam ayat nya iya ke bendar ukai muji tang deka madahka Jang tu siku orang ti buruk gawa. Maya ngenataika leka jaku nya kitai deka ngena intonasyen tauka entak sebut ti betul.

Reti konseptual

Reti tu iya nya reti ti ditulis tauka disebut aja, chunto iya baka sekula endur  nembiak belajar. Taja pia, reti konseptual ba siku- siku kitai kadang- kadang iya enda sebaka. Ambika chunto indai ba Muduk iya selalu diperinsa indai iya lalu ba Silly iya amat dikesayauka indai iya. Lalu leka jaku indai ba seduai tu tadi enda sama laban iya ti keterubah iya ngumbai indai nya orang jai laban selalu merinsa iya, lalu ba nembiak ti kedua, leka jaku indai nya tadi manah laban orang ti sayauka iya.

Reti stilistik

Stilistik tu jaku ti dikena ba situasyen ssosial tauka ba mua orang mayuh. Chunto iya baka dikena kitai ngemaruhka diri, Sani ngelaluka bakih iya ke rumah iya munyi tu 'lalu mih, niki ke langkau aku tu', enti ke bendar rumahiya nya chukup manah dipeda.

Definisyen Jaku Dalam

Konsep jaku dalam

Jaku dalam tu nyengkaum sempama, sema banding, jaku simbol enggau ti bukai ( Keris Mas, 1990:113) ti dikenataikan siku- siku orang ngagai orang ti bukai. Iya ke suah agi, jaku dalam tu dikena meri lalau, ngasuh, negah enggau ajar ti bukai dalam pengidup raban bansa iban.

Jaku dalam tu bepun ari analogi, iya nya dikena nyaga adat, kaul enggau pangan diri sereta meri pengidup kitai nadai laya. Penganalogian bagi jaku dalam tu diambi lalu dikaitka enggau rampa menua sereta mensia empu. Bisi empat bengkah utai ti dikaitka enggau jaku dalam tu iya nya perengka guna, jelu tupi tauka jelu siga, utai tumbuh sereta mensia, iya nya bagi dalam tubuh mensia baka pending, jari enggau ti bukai ( Maniyamin Ibrahim, 1998:390). Empat bengkah pekara tu bekait enggau pangan diri.

Nitihka pansik Asmah Haji Omar (1996), madahka bagi dalam tubuh mensia ti chukup mayuh dikena dalam jaku dalam tu. Jaku dalam tu mega bisi dikenataika ngena chara nyengenda enggau enda nyengenda. Nya kebuah jaku dalam tu chukup iya pedis diperatika kitai kemaya hari diatu enti kitai enda belajarka jaku dalam nya. Orang ke tuai menya suah agi ngena jaku dalam tu enti sida deka ngerara ulah orang ti enda tentu manah enggaika ngemediska ati orang nya enti dikenataika enggau terus.

Bansa jaku dalam

Dalam raban bansa kitai iban, kitai bisi ngembuan tiga bengkah jaku dalam. Tiga bengkah jaku dalam nya chukup beguna dalam pengidup raban bansa kitai iban. Dulu menya, sida iya deka ngenataika siti- siti pekara nya ngena jaku dalam nitihka nama bagi utai ti deka dikenataika.

Entara jaku dalam kitai bansa iban baka sempama, dalam sempama bisi bagi iya ke bukai iya nya sema banding, silup, kelaung enggau lalau pendiau. Semua nya ngembuan reti iya kediri empu ti enda sama enggau pangan diri. Iya ti kedua iya nya jaku karung, lalu ti ketiga iya nya jaku simbol. Lalu dalam jaku simbol bisi pesindang, pelepa, temuku tali, tambai, ruding enggau terantang begau. Semua bansa jaku dalam nya tadi chukup beguna amat dikena raban bansa iban nyentukka diatu.

Pekara ti deka dikenataika ngena jaku dalam tu enda dikenataika enggau terus tang besilup, belalai, besema, besuruk tauka beentelah. Reti nya, utai ti dipadahka ngena jaku nya kediri empu. Jaku dalam tu mar diperatika enti kitai enda belajarka reti nya dulu. Jaku dalam tu mega sebengkah ari kereban ti dikena kitai ngemanahka pengelandik bejaku kitai empu enggau manah agi.

a)    Sempama

Sempama tu endang iya penemu asal ti chukup manah amat dikena kitai. Orang kelia ke tajam runding ngumbai sempama nya pemanah runding terebai. Sempama nya pengelandik dikena mensia bejaku, ngasaika pengamat, pemetul kitai enggau ti bukai. Sempama kitai iban endang sigi iya mayuh udah ditengkebang kenyau ari dulu kelia. Sempama tu mega ulih dibagi ngagai tikas ti mit agi baka;

Sema banding

Jaku sema banding tu utai ti disemaka enggau nyemetak, iya nadai tentu ngena leka jaku ti pedis deka diperatika kitai. Gaya utai ti deka dikenataika kitai nya disebut nyemetak enggau nadai belalai sereta nadai beentelah. Dikena ngepunka ayat dalam jaku sema banding tu, kitai deka ngena jaku baka, asai enggau munyi. Ambika chunto baka merau endang nitihka arus ti ngemai reti, meruan bisi utai dititihka, ditunda, diteladan ukai empegal ngapa. Chunto ti kedua iya nya asai ke ngenyadika anak mata ti ngemai reti, ngenyadika utai ti pemadu dipeguna, dikesayau enggaika lenyau tauka rusak. Chunto ti kepenudi iya nya munyi ke mandam tampun mulung ti ngemai reti, jaku ti dikena nyemaka munyi utai ti tibu didinga. Lalu semua nya tadi chunto sema banding ti ngena leka jaku baka, asai enggau munyi dikena ngepunka ayat.

Jaku silup/ jaku kelaung

Jaku silup tu suah agi disebut orang jaku kelaung lalu nyelai agi ari jaku sema. Kebuah pia laban jaku silup tu bisi belalai tauka beentelah, enda baka jaku sema ke alai utai ti endur nyemaka nya ulih dipeda, didinga tauka diasaika.

Leka jaku nya selalu iya mudah diperatika enti kitai nyalin iya seleka- seleka tauka sepemanjai luntang iya baka ka ngabas rau ( ba sungai). Enti enda diperatika enggau lenak dia kitai deka melabaka orang nya deka meda rau ba sungai. Lalu reti iya ti ke bendar ti dikenataika dia iya nya madahka iya deka nurun berikan ba sungai. Jaku silup ti bansa tu dikena ba endur ti agi latung. Chunto iya ti ke bukai baka matahka lengan ti ngemai reti makai, nepu asap ti ngemai reti orang ti berapi manduk asi enggau mega chunto ti ke bukai.

Jaku lalau pendiau

Jaku lalau pendiau tu iya nya leka jaku ti dikenataika nya meri ajar ngagai orang ti ninga iya. Iya enda terus ngagai reti ti deka dikenataika tang ngena jaku ti bebungai ngambika orang ti ninga jaku iya nya enda berasai pedis ati tauka ensiban enti utai ti deka dikenataika iya nya bisi besangkut paut enggau ulah siku- siku orang ti ninga iya bejaku nya.

Jaku lalau pendiau tu mega dibantaika ngena chara ti chukup manah ti nunjuk ngagai adat bansa kitai iban. Jaku tu mega dikena sida ke tuai meransang bala orang ke biak ngemansangka diri dalam pengidup sida jemah ila. Ambika chunto baka adat napang bekunsi rintung, adat ngasu bebagi semeliung. Reti ti dipadahka ba genteran nya iya nya adat begulai sejalai endang betulung besukung, lalu baka nya mega adat lebuh turun begiga ke babas. Utai ulih, mayuh mimit deka dibagi bela. 

b)   Jaku simbol

Jaku simbol tu mungkur enam iti jaku ti ke bukai baka pesindang, pelepa, temuku tali, tambai, ruding enggau terantang begau. Jaku simbol tu beguna amat dikena bala aki ini kitai kelia dikena sida iya bepesau ngagai orang bukai sekalika maya tusah tauka maya senang. Sida iya ngena jaku simbol tu dulu menya laban nadai utai ti baka kemaya hari diatu dikena betesau ngagai pangan diri. Entara jaku simbol iya nya baka:

      Pelepa

Pesindang tu iya nya tanda ti dipelepaka ba mua pintu ke tanda ba bilik nya orang udah belian. Kebuah iya meri pesindang dia ngambika orang bukai nemu sida nya sebilik udah belian. Pengudah ti belian, bisi utai ti enda tau dibai tama ngagai bilik orang nya. Bisi sekeda iya mega, enti udah belian, bilik orang nya enda tau ditama dalam timpuh tiga hari tauka nitihka padah manang ti bebelian ke sida iya nya. Utai ti dikena nyadika pesindang ti digitang ba mua pintu baka pua kumbu, kain belachu tauka utai bukai.

Pesindang tu mega ulih nyadika simbol dikena kelai orang indu dipelepa ngena tinchin. Tinchin nya dikena ngelaika orang indu nya udah ditunang orang. Buah mega tau dipelepa nandaka buah nya bisi orang ngempu ngambika orang enda ngambi buah iya sepeneka ati aja.

Pesindang

Pesindang tu iya nya kelibak tauka sempiar kayu ti ditibak sereta diselitka ba batang kayu ti ke bukai. Kelibak tu diselitka melintang ngambika nyamai dipeda. Pesindang tu digaga dikena ngelaika sesebengkah utai. Chunto utai ti ulih digaga kitai ke pesindang tu iya nya baka pun buah kitai empu. Kitai deka ngaga kelibak ba pun kayu nya nunjukka kayu nya bisi orang ngempu lalu sapa bagi orang ti ngambi buah iya enggau enda bepadah, dia orang nya deka kena tusun tunggu.

Pesindang tu digaga mega dikena ngelai alai endur orang meti tauka ngetan panjuk. Kebuah pia laban enggaika orang ti bisi bejalai kia lalu nuju panjuk sida ngunjungka orang nya kena sintak panjuk. Kena sintak panjuk nya pedis lalu tau ngasuh orang nya merinsa kelebih agi enti iya bejalai kediri aja nadai orang bukai enggau iya. Kelimpah ari nya pesindang tu mega dikena ngelai ke endur ti tau ditengah maya ti bejalai ba kampung puang ngambika enda tesat.

Temuku tali

Dalam bup jaku dalam ( Janang Ensiring & Dr. Robert menua Salleh) bisi madahka jurai seduai senentang utai ti dikumbai kitai temuku tali tu. Temuku tali tu iya nya tali ti disimpulka sekalika digagaka temuku kena ngitung hari dalam siti timpuh pasal pengawa besai ti deka dikereja.

            Pengawa ti selalu ditesau orang ke menya ngena chara temuku tali tu baka hari gawai, pengawa melah pinang, pengawa ngayau enggau mega pengawa ti ke bukai. Dalam atur temuku tali nya, setiap iti sintal nunjukka ngagai sehari ba sida iya menya. Setiap hari, siti ari sintal temuku tali nya deka diketas sampai ngagai pengabis ketas ti kepenudi. Pengudah ketas ti kepenudi, hari siti pengawa ti deka dikereja dipenyadika sida iya lalu bala ti udah ditesau deka ngunsung orang ke bempu pengawa nya tadi.

Dalam temuku tali tu mega, sida bisi ngena kelai baka selambar bulu manuk nyaa nunjuk ngagai utai ti dipadah nya enda tau enda ditesau ngagai rumah orang bukai enggau naka pengelengkas.

Tambai

Tambai iya nya nunjuk ngagai kelai tauka tanda sesebengkah rumah nya enda tau ditiki temuai ketegal ti bisi tinggang penti pemali. Gerempung daun kayu deka digitang ba pala tangga setak- setak rumah panjai nya. Nambahka nya, tisi tauka sukut umai dipelepa enggau daun rejang nandaka umai nya udah diintu sida iya.

Tambai tu mega bisi digitang enggau kayu ba pendai lalu mega jalai nuju ke rumah. Tambai ti bisi digitang dia iya nya kain enggau chapak ti dituat ngena kayu. Tambai ke bansa tu dikumbai kitai bansa iban tambai ulit ti nunjukka ba rumah nya bisi orang udah parai.

Ruding

Ruding tu iya nya tulang ke lemi ba idung babi, lalu enti ba leka pantun iya mai reti kesuling. Ruding tu suah agi dikena orang raban bansa penan, lalu sida iya ngelar nya oreng lalu dimainka maya bisi lepa.

Ruding tu suah dimainka orang bansa penan ke indu, lalu dimainka dikena madahka pengaga ati tauka maya tusah mega. Ruding tu mega selalu dimainka enti nyema bisi temuai datai ngagai menua sida lalu nunjuk ngagai sida iya perengka ti dikena sida iya beperindang. Ruding tu pedis dimainka enti enda orang ke landik main ruding nya. 

Terantang begau

Terantang begau tu iya nya pengawa bepadah lalu bepangkungka tawak awakka orang ti ninga pangkung tawak nya tadi datai ngesah sida iya. Tawak ulih dipangkung enti maya bisi orang rabat, serang musuh enggau pengawa tusah ti ke bukai.

Munyi pangkung tawak maya ti ngagauka orang enti bisi penusah enda sama munyi pangkung iya enggau pengawa bukai baka begawai. Bala iban menya nadai perengka ke moden baka ke sehari tu dikena betesau ngagai pangan diri enti enda ngena tawak. Tawak nya enda tau dipangkung sengapa aja enti nadai tuju ke bebatang.

Guna jaku dalam ba pengidup raban bansa iban

Jaku dalam tu dikena raban bansa iban ngelaungka utai ti deka dikenataika sida iya. Sida iya ngena jaku ti bebungai ngambika pekara ti dikenataika iya nya enda ngasuh ati orang bukai ensiban. Raban bansa iban menya landik amat ngena mayuh bengkah jaku dalam dikena sida iya bejaku enggau pangan diri besehari- hari.

Jaku dalam tu iya nya pengelandik ti dikena mensia bejaku, ngasaika pengamat, pemetul kitai ngereja pengawa. Jaku dalam tu lalu dipeturunka ari aki ini kitai kelia nyentukka ngagai kitai kemaya hari diatu.

Guna jaku dalam ke nyemetak bendar iya nya dikena meri lalau tauka ajar ngagai orang bukai,kena ngelaungka utai ti deka dikenataika enggau mega dikena ba randau ti ke bukai nitihka chara iya dikena lalu engkeman. Pekara bukai ti disengkaum dalam jaku dalam iya nya baka pengasai ati mensia, gaya pengidup, pendiau enggau ulah, gaya rampa menua tauka pekara bukai ti nyadi ba kelinggi kitai semua.

Nambahka nya mega, jaku dalam tu bisi dikena nerangka gaya utai ti enda ulih dipeda, ke semina ulih diasaika, baka tiup ribut enggau utai ti semuti ulih didinga aja, auh ujan, depur guntur, penerebai burung geruna enggau utai bukai ke beribu leman.

Jaku dalam tu mega dikena nyema ngagai ulah kitai mensia kelebih agi. Ambika chunto, enti orang nya selalu enchuri, dia kitai ngumbai iya panjai jari. Kitai enda terus ngumbai iya rindu enchuri tang dikelaungka kitai enggau leka jaku panjai jari. Pia mega, kitai mega ulih madahka enti orang nya gamal iya chukup bajik dipeda, kitai ulih ngena leka jaku baka perenching baka senaya bulan pegari. Kebuah kitai ngena leka jaku nya ngambika iya manah agi didinga.

Entara bagi dalam guna jaku dalam iya nya baka dikena ngelangkung iya nya nambah tauka ngerembaika berita. Ambika chunto baka mansau baka jerenang, jaku ti dikena nyema ke pemirah chura, keba nyau mirah baka chura jerenang. Lalu chunto situasyen iya nya 'apu mansau baka jerenang pua kumbu ti dikebat ini aku nya'. Ti nunjukka utai nya mansau chechinang.

Iya ti kedua iya nya dikena ngerinduka orang ngena puji ti nyeriri. Jaku ti dikena iya muji orang nya baka ke nyeriri, enda terus muji. Ambika chunto baka leka jaku baka perenching mata pemanas nunjukka ngagai mua orang indu ti chukup pemajik.lalu chunto iya ba situasyen iya nya 'naka pemajik mua Endun nya nyau baka perenching mata panas'.

Iya ti ketiga iya nya nyeriri ti dikena bejai, ngelese, mantah, mejar enggau ti ke bukai. Ambika chunto baka pama diri ti ngemai reti bisi pemama ba pekara pemanah tauka penyai. Dalam situasyen iya nya 'Fina nya pama diri iya taja pan gamal iya dipeda baka nya'.

Iya ti keempat iya nya ngelaung ti ngemai reti dikena ngelipak tauka nyeliahka nama, utai, pekara ngambika siru agi didinga. Ambika chunto baka tabin jari ti madahka anak mit ti enda tentu pengerai tauka belayan padi ti tengat enggai galak sereta mati- mati kerupai. Baka chunto ba situasyen iya nya 'anak madi Muduk nyau majak tabin jari diatu'.

Iya ti kelima iya nya nyilup lalu dikena ngenataika pekara ti besakal enggau ti disebut baka matahka lengan ti ngemai reti makai. 'Sida Jerry sebilik tumu matahka lengan sari nya'.

Iya ti keenam iya nya ngarung ti dikena ngemanahka rurun leka jaku ke bebungai sereta beseneibal. Lalu mega ngerangkung semua sempama, jaku kelaung, silup, sema, sebar enggau mega leka main ti ke bukai. Ambika chunto baka agi dua ati ti nunjuk ngagai apin bisi siti aja pemutus runding lalu baka chunto 'Indai agi dua ati deka ngelengkaka anak iya sekula jauh'.

Iya ti ketujuh iya nya bentelah ti dikena bemain tauka ngisi maya lepa baka leka jaku laja apai Sali ti nunjuk ngagai hari ujan, ba dia iya belalaika entelah. Menya orang ke tuai suah mansutka entelah maya bumai betaun baka maya maya mantun enggau ngetau ngambika enda berasai daing panas. Suah mega orang bentelah maya malam hari dikena merindang malam sebedau nindukka diri.

Iya ti kelapan iya nya ngansah lalu dikena muji pangan diri lebuh maya pengerami baka maya melah pinang, maya gawai enggau mega pengerami ti ke bukai. Peransang enggau basa dikena ngangkatka orang ti dituju nya ari penuduk diri. Ai ansah tu enda tau diberi ngagai orang ti ke salah enggaika bisi penekul.

Iya ti kesembilan iya nya begelega ti dikena meri jaku ajar tauka jaku tangkan ngagai bala pengabang ti datai ba sesebengkah pengerami. Bala orang ke udah dipadu mansutka jaku nya deka mai selebuan tawak, lalu tiap- tiap kali sida datai ba ruai orang ke bempu pengawa, tawak lalu dipalu dikena ngasuh bala pengabang ngetu bejaku lalu dipinta mendingka sida tu dulu. Pengawa tu dikereja datai apus ruai sepemanjai rumah orang nya.

Iya ti kesepuluh iya nya nyela lalu dikena ngaga gegelar tauka nama dikena ngagauka orang ngambika iya teperansang ati ngereja pengawa enti maya jejuluk iya nya disebut. Iya bekaul enggau pengawa sereta bepanggai ba ulah orang nya empu. Ambika chunto baka Manang Mejaya ti digelar orang Manang Bali ke tebilang disebut orang Menjaya Manang Raja ke Betelaga Baruh Rekung, Manang Bali Menyadi Aki Lang Sengalang Burung tauka dikumbai Matai Tuai Raja Menjaya, Manang Langgung Ngembuan Puchung Penyangga Nyawa.

Iya ti kepenudi iya nya bensumbar lalu diberi ngagai siku- siku orang ketegal pengawa iya ti bisi lebih tauka pama agi ari enggi orang bukai baka pemerani lebuh maya ngelaban munsuh. Ensumbar ti diberi orang nya baka bujang berani kempang.

Lalu disimpulka aku ditu, guna jaku dalam endang iya mayuh ba pengidup raban bansa iban nyentukka diatu. Pengawa ti bekenaka jaku dalam tu agi dikemeratka nyentukka diatu lalu kitai enda tau enda ngetanka adat tu enggaika lenyau jamah dudi hari ila enggaika nadai dipeda raban ke dudi ila.