NOTA SINTAKSIS JAKU IBAN

Definisyen sintaksis

Chemaline et.al (2011), madahka sintaksis nya pansik ti bejuraika senentang tukuh, struktur enggau konstruk ayat. Iya mega ti nentuka atur tauka ukum jalai jaku ti bepelasar ba ripih jalai bejantilka leka jaku, nusun leka jaku enggau raban leka jaku dikena nempa ayat dalam jaku Iban.

Nik et.al (2010), bejuraika sintaksis nya ulih dipeda nyadi siti pampang penemu jaku ti mansik apak baka tukuh, struktur, sereta pasuk enggau konstruk ayat. Sintaksis tu mega ulih diperatika nyadi siti pansik senentang ukum tauka atur jalai jaku ba sesebengkah leka jaku.

Nambahka nya mega, nitihka penemu Ahmad (2008) madahka maya nempa siti ayat begunaka jaku. Jaku nya lalu disakum enggau jaku ke bukai lalu ngasilka frasa nama tauka rambai jaku nama lalu sakum frasa nama ngasilka klausa tauka ayat. Lalu pampang linguistis ti mansik tukuh ayat tu dikumbai sintaksis.

Lalu, bisi mega nitihka penemu bala sida anda baka Ramlan (2001), bekunsika penemu ti madahka sintaksis pampang penemu jaku ti mansik senentang wachana, klausa enggau ayat. Harimurti Kridalaksana (1993) meri definisyen sintaksis nya sebagi ari atur enggau kaul entara jaku enggau jaku, tauka mega kaul jaku ke lebih mayuh agi dalam sesebengkah leka jaku. 

Nyadi jurai ba atas nya tadi sekeda definisyen sintaksis nitihka penemu bala orang ke anda senetang pampang penemu sintaksis tu.

Konsep, sakum konstituen enggau atur ngaga ripih leka jaku ba ayat pasif jaku Iban

Abdullah et.al (2006), bejuraika ayat nya ulih dipeda ari tiga iti pampang baka ayat, klausa, frasa enggau leka jaku. Ayat nya jalai jaku ke pemadu besai ti ngembuan subjek enggau predikat. Klausa iya nya ayat ba ayat, lalu mega bisi ngembuan subjek enggau predikat. Lalu frasa nya tukuh ti bisi dipeda ba ayat enggau klausa. Leka jaku lalu ulih dipeda ba dalam frasa ti ngundan empat bengkah bansa frasa ti bisi dikembuan raban bansa kitai Iban.

Chemaline et.al (2011), madahka tiap ayat ti ditempa disebut pasuk tauka konstruk. Sesebengkah pasuk ayat nya ukai semina berakup tauka bejantilka leka jaku enggau sepeneka ati. Pasuk ayat ti menyana nekanka atur nusun unit ti bekeremit dalam frasa jaku ti dikumbai konstituen. Sakum konstituen nya mega patut digaga enggau betul ngambika iya ulih ngasilka siti ayat ti menyana dipeda ti ulih dikena.

Ambika chunto baka penerang ba atas nya tadi, iya nya baka Belayung tinduk. Baka ba chunto tu, iya ngayanka siti pasuk ayat ti ngundan dua konstituen. Baka chunto ke diberi nya bagi chunto ke mudah aja, tang ba dalam jaku Iban mayuh ayat ke bukai ag. Kitai ulih nguse ayat nya berindik ari klausa ti bisi ngundan leman frasa lalu ukai semina ba rintai leka jaku aja.

Nitihka Nik et.al (2010), orang ti bejaku ngena jaku Iban tulin patut ngembuan penemu dikena nentuka struktur leman tauka struktur konstituen ba bagi leka jaku ti dikena ngaga ayat ke menyana. Lalu bagi orang ti ngena jaku nya patut nemu ngaga ba bagi ayat nya tadi ngagai dua bagi iya nya subjek enggau predikat.

Ambika chunto baka “Kerani nya kereja ba sekula kami”. Lalu ulih dikelala kitai, subjek ba ayat nya konstituen ti ngundan seleka tauka lebih jaku ke betukuh frasa nama. Lalu predikat iya nya raban leka jaku dalam siti frasa baka ari frasa nama, frasa pengawa, frasa penempat enggau frasa adjektif, ti nyadika leman ti nerangka subjek nya tadi.

Kelimpah ari nya, jaku Iban endang bisi ngembuan atur dikena ngaga ripih leka jaku ba dalam pasuk ayat pasif jaku Iban. Ayat pasif nya dipenyadi ari ayat aktif ti dibali endur penuduk bagi ba subjek enggau predikat. Ayat pasif tu deka meri ubah ngagai konstituen ba dalam pasuk ayat, iya nya sekalika berubah semua tauka setengah aja ti berubah. Iya berubah baka subjek nya diberi ngagai belakang lalu predikat diberi ke mua, lalu nyadi siti proses meri nyadi ayat pasif ari ayat aktif.

Ngambika nyamai agi diperatika, ditu bisi chunto ba atur ngaga ripih bagi nusun leka jaku. Baka “Pengajar nya ngajar ba sekula kami”. Pengajar nya nyadika subjek iya, lalu ngajar ba sekula kami nya predikat ba chunto ayat ti ditempa nya. Chunto ayat tu ayat aktif lalu enti iya nyadi ayat pasif, ayat iya deka berubah baka “Ngajar ba sekula kami pengajar nya”. Subjek iya udah mindah ke belakang, taja pia iya agi manggum siti reti ti sama lalu enda berubah.

Atur ngaga ripih ba leka jaku ayat pasif enda ulih diengkahka pia aja, laban iya endang sepatut iya nitihka atur ke engkeman. Enti iya udah nyadi ayat pasif, frasa nama deka diengkah ke belakang lalu leman penerang iya baka ari empat bengkah frasa nama. Ambika chunto baka “Indai aku meli ikan” ba ayat pasif lalu enti iya nengah proses transformasyen lalu nyadi ayat pasif, ayat nya deka berubah endur baka” ikan nya dibeli indai aku”, lalu iya mega deka nerima penambah di- ba leka jaku meli lalu ‘m’ ditingkilka sereta nyadi ‘dibeli’.

Lalu disimpulka aku ditu, konsep, sakum konstituen enngau atur nusun leka jaku ba ayat pasif jaku Iban nya sebengkah ari siti proses ti patut dikemeratka tiap iku orang ti ngena jaku Iban ngambika ulih ngena leka jaku nya enggau engkeman. Leka jaku ti deka dikena patut ditisih enggau betul ngambika jaku kitai ulih nyadi siti leka jaku ti entap.

PASUK FRASA NAMA

TERAS +TERAS (MAI KAUL BETIMBAL RETI)

-       Leka jaku ti ngisi kedua- dua teras dalam pasuk ayat

-       Chunto: entua menantu, pinsil bup, tuai biak, kesulai bungan etb

-       Bepelasarka chunto nya, semua leka jaku nya ngembuan reti ti betimbal tauka besangkut paut enggau pangan diri.

-       Baka ba leka jaku “entua menantu”. Nyema bisi entua tentu iya bisi menantu. Tu mandangka jaku nya bisi besangkut paut.

Tusun konstituen frasa nama

-       Bisi atur dikena nusun pengekah

Atur D- N

-       D (diterangka), N (nerangka)

Chunto baka: Polis Malaysia, injin rumput

Dikena ngaduka tusun leman frasa nama

Chunto: Estiza Resort- Resort Estiza, Nalau Klinik- Klinik Nalau etb.

Enda disengkaum atur D- N

-       Ba sekeda jalai nusun FN penerang (N) tau dipeda dulu agi ari leman ti diterangka (D)

-       Iya udah nyadi lebuh dikena nusun nama pangkat

-       Sosial linguistic convention

Teas enggau kangau

Teas

-       Pugu frasa nama ti mantaika teas enggau kangan

-       Chunto: dua iku nembiak, empat buah rumah panjai etb

Kangau

-       Nunjukka gelar tau kangau

-       Tau diengkah ba mua frasa nama

-       Chunto: Tun Jugah, Rajah Brooke,Temenggong Banyang etb.

Tusun konstituen frasa nama jaku Iban  (penerang)

-       Teras mega bisi mai lebih ari siti penerang.

1)    Penerang adjektif ti nerangka teras enggau nyengenda

Teras + penerang adjektif + penerang + penentu belakang

-       Chunto: entukar lama aya nya, rumah baru menijar nyin etb.

2)    Lebuh duai iti frasa nama ayan

Teras + penerang adjektif + penerang (teras) + penerang + penentu penerang.

-       Kaul leman ti bisi ba frasa nama tadi tau dipeda ba kar garis di baru tu. Garis ti ayan ba kar nya mandangka leman ti bekepit enggau kaul

( konstituen pengambis semak) ( kaul pengambis semak)

- strategi dikena nguse frasa ari sukut reti ti pengambis semak.

Chunto: entukar lama aya aku nya

- entukar semak enggau lama

- aya semak enggau aku

- baca nitihka kaul iya

Pasuk frasa kereja

-       Tau ngundan siti aja leka jaku

-       Ambika chunto: kami tinduk

Tau jaku pengawa transitif lalu tau mega ukai transitif

Chunto ukai transitif: kami mandi

Chunto transitif: kami nginti ikan

-       Jaku pengawa ukai transitif tau meali- ali tauka serentayan leka jaku.

-       Chunto: kami mandi di kaki wong.

-       Jaku pengawa transitif mesti bisi ditangka enggau objek.

-       Chunto:

Objek (sama enggau penyamput)

Chunto: nyipak bol (penyambut)

Ayat ke begantung begunaka pengenap iya

            ba jaku iban sekalika bisi ayat komplimen tauka nadai

chunto:

Atur nempa frasa kereja

Pasuk frasa nama

-       Semua konstituen berindik ari jaku nama

Teras + penerang nama peturun

Teras + penerang nama bansa utai

Teras + penerang nama penyambut

Teras + penerang nama guna

Penerang nama penempa

-       Nerangka penempa teras

-       Chunto: orang lelaki, anak indu

Penerang nama penempat

-       Endur tauka penatai teras

-       Chunto: anak Sarawak, Iban kuching

Penerang nama adap

-       Tunga tauka kuing teras

-       Chunto simpang kiba, pintu belakang, pati kanan

Penerang nama batang tubuh

-       Bagi batang tubuh ti bekaul enggau teras.

-       Chunto: pala patung, bulu bansu, tunjuk kaki etb...

Teras + penerang nama penatai kuasa

-       Kuasa ti dikena bejalaika rengka di dalam teras

-       Chunto: lampu letrik, kipas angin, jam solar

Teras + penerang nama pekara

-       Nunjuk kebuah tauka pekara ti bekaul enggau teras.

-       Chunto: rumah pasung, bilik aum, surat pengada etb

Teras + penerang nama ngembuan

-       Reti sereta kaul ngembuan sekalika beempu sesebengkah pekara dalam teras.

-       Chunto: baju Suda, rumah aku, mija sida etb....

Teras + penerang nama menyana

-       Bepegai ngagai nama menyana dikena nerangka teras.

-       Chunto:  batang Lupar, pasar Bintangor, nenger Sarawak, etb...

Teras + penerang nama pangkat / gelar

-       Leman ti mdhka pangkat, gelar, ensumbar tauka kedua bali nama.

-       Penerang diengkahka dulu ari teras.

-       Chunto: kepala pengajar, ketuai Menteri, tuai rumah, etb

Frasa nama

-       Leman ti dipeda ari seleka jaku tauka mayuh leka jaku

Sakum frasa nama

Teras + penerang nama

Teras + penerang ukai nama

-       Frasa nama ulih dipenyadi ari teras ti nerima penerang ukai ari bansa jaku nama.

Teras + penerang penentu

-       Leman ti madahka tukuh jaku nama.

-       Endur iya tau di mua enggau di belakang

-       Penentu ari mua

G  Datai ari mua jaku nama lalu elemen nya bediri ari jaku pengenap teas

G  Chunto baka: lima iku, bepuluh- puluh buah.

Teras + penerang teras ordinal

-       Jaku teas ti nunjukka tusun teas nitihka penyampau

-       Chunto baka : bini kedua, lumur kesatu,pesan kepenudi

Teras + penerang jaku adverb

-       Nerangka chara tauka timpuh ngagai teras jaku nama

-       Chunto baka: saut seretai, penatai pagila, hari lusa.

Teras + teras

-       Nadai mai leman penerang laban reti frasa nama udah dibungkur dua leka jaku teras.

Teras + teras mai kaul sama reti

-       Mai kaul ti sama reti.

-       Baka: pinggai mangkuk, kayu ramu, kaban belayan, reta tengkira

Definisyen lebas jaku

Lebas jaku nya mai reti gaya tauka chara guna iya dalam siti-siti jaku ti bisi dikena kitai besehari-sehari. Siti-siti lebas jaku nya dikumbai variasyen jaku ti ulih dipilih ari raban variuasyen tauka bansa ti bisi ba guna jaku nya, chunto iya baka jaku ti dikena kitai bejaku enggau apai indai, pengajar kitai, orang ti bejual ba tamu enggau ti bukai.

Lebas jaku mega siti konvensyen sosial, reti iya lebas jaku dikena ba siti-siti situasyen ti enda sama nitihka sapa bagi orang enggau kitai bejaku nya. Kitai ulih milih mayuh lebas jaku ti deka dikena maya kitai deka bejaku, ambika chunto, enti kitai bejaku enggau pengajar kitai enda sama lebas jaku ti deka dikena enti sema kitai deka bejaku enggau apai indai kitai. Pemayuh lebas jaku ti dikena siku- siku orang nya nunjukka iya bisi mayuh peneleba ngena mayuh leman lebas jaku ti bebida.

Nambahka nya mega, pemayuh lebas jaku ti dikena ba siti-siti komiti aku nunjukka orang nya ngembuan peneleba ti mayuh bekenaka mayuh bengkah lebas jaku ti bebida. Lebas jaku enda entap, iya semampai berubah nitihka pemansang dalam siti-siti komiti ti ngena lebas jaku nya. Mayuh agi pemandai ti bisi diulih, mayuh agi lebas jaku ti bisi dikena kitai maya ti bejaku enggau mayuh bengkah raban orang nitihka lebas jaku ti engkeman.

Ari semua penerang nya tadi, tu nunjukka lebas jaku nya siti aspek ti beguna amat dikena ngenataika batang pekara ti deka dikerandauka enggau orang bukai ngena lebas jaku ti engkeman.

Penemu bala ke landik mansik senentang lebas jaku

Nitihka penemu Halliday (1968), iya mai kitai ngelala konsep jaku ti beduduk ari guna jaku nya enggau orang ti ngena jaku nya. Kenang iya endang berindik ari pun penemu ke madahka jaku nya iya nya sistem kelai tauka lambing munyi arbitrary ke dikena mensia ba siti-siti genturung pendiau maya ti berandau enggau pangan diri. Halliday mega madahka lebas jaku nya siti variasyen jaku ti dikena nitihka gaya iya. Lebas jaku mega berubah nitihka situasyen ti dikena maya berandau enggau siku- siku orang. Halliday mega mida lebas jaku ngagai tiga bengkah iya nya batang wachana ( field of discourse), chara mantaika pekara ( mode of discourse) enggau gaya batang pekara (manner of discourse).

Kelimpah ari nya, nitihka penemu J. R Firth (1956), endang udah dulu nempa konsep jaku ke beduduk ari konteks gaya enggau maya tauka ( context of situation), ti mai reti sesebengkah leka jaku ditengkebang lalu dikena  ba maya tauka nitihka konteks randau. Nitihka pansik Reid (1956), iya madahka orang ke bejaku ba situasyen jaku ke bebida deka ngena lebas jaku nitihka situasyen  tauka maya sida ke bejaku nya. Lalu pia mega nitihka penemu Ure enggau Ellis (1977), madahka lebas jaku nya pola guna jaku ti bisi dikena dalam situasyen iya kediri empu.

Penteba

Pugu lebas jaku

I.      Batang wachana (field of discourse)

 Iya madahka lebas jaku nya belalauka bidang baka biologi, berubat, politik enggau ti bukai. Dalam pansik iya mega madahka nentuka lebas jaku ti dikena dalam kosa kata sereta bansa ayat enggau ragam ayat ti dikena. Enti wachana nya bekenangka pekara pelajar, lebas jaku iya patut ngena leman ayat pasif dikena meri fosus ngagai pekara ti dipadahka.

II.     Chara mantaika pekara (mode of discourse)

 iya madahka bisi dua iti chara iya nya betulis enggau enda betulis. Chunto enti ngena chara betulis baka teks jaku,ripot, surat enggau ti bukai. Ngena chara enda betulis baka bejaku enggau raban komiti, nusi cherita enggau ti bukai.

III.   Gaya batang pekara (manner of discourse)

iya nya siti chara wachana enggau gaya dikelala ari teks jaku ti engkeman ba tikas ti  besempikut ba penerima, gaya idup enggau ti bukai.

Penteba ke bukai

1)    Penteba kaul tauka situasyen

Ure enggau Ellis (1977), bisi magika penteba kaul tauka situasyen  tu ngagai dua bengkah. Iya keterubah iya nya situasyen ari luar enggau situasyen ti ngelinggi diri empu. Enti iya situasyen ari luar, iya mai reti daya idup sosial enggau budaya siti-siti komuti jaku ba siti-siti genturung pendiau mensia. Siti-siti komiti jaku mayuh enda sama enggau siti-siti komuti jaku ti bukai. Lebas jaku ti dikena nitihka sapa orang ti diau begulai enggau komiti nya. Ari situasyen ti ngelinggi diri empu tu iya nya lebas jaku ti bisi dikena orang ke enggau begulai. Pemayuh lebas jaku ti dikena ulih meri mayuh bansa lebas jaku ti bisi dikena dalam komiti nya. Chunto penteba iya ke bukai baka ke dibaruh tu.

a)    Chara nyampaika jaku

Iya nya chara kitai deka bejaku tauka berandau enggau orang bukai ti nyengkaum bansa jaku, orang ti enggau bejaku sereta pengelama ti dikena maya ti ngena lebas jaku nya. Jaku ti enda betulis enda sama enggau jaku ti betulis. Kitai semua patut nemu mida dua bengkah nya tadi.

b)    Kaul sosial enggau ukai sosial

Dalam kaul sosial, iya nya baka orang ti nyelak berita enggau ti bukai lalau bisi orang meli utai ti digaga sida nya tadi lalu macha iya. Nya meh ti dikumbai kaul sosial dalam lebas jaku tu. Taja pia, dalam kaul ukai sosial, jaku ti dikena iya nya enda resmi, baka sida iya ngena jaku ganti nama baka aku enggau nuan ti dikena.

c)    Utai ti dikerandauka

Utai tauka pekara ti deka dikerandauka deka ngena lebas jaku ti bebida nitihka bansa utai ti deka dipejuraika siku-siku orang nya. Pengawa tu nyengkaum pengidup kitai besehari-sehari.

d)    Guna sosial dalam bansa jaku

Dalam situasyen sosial, bisi guna jaku ti ngembuan mayuh bengkah guna baka maya bejaku, orang ti enggau bejaku enggau guna iya ngagai siti-siti komiti jaku.

2)    Penteba linguistik

Penteba linguistik tu mega ulih nempa lebas jaku, lalu penteba linguistic tu bisi kaul enggau apak social,orang ti enggau bejaku tauka betulis, kaul entara orang ti bejaku enggau penulis sereta peninga sereta batang utai ti dikerandauka sida iya.nambahka nya, gaya jaku ti dikena mega bisi meri ubah ngagai siti- siti lebas jaku ti dikena lebuh maya berkomunikasyen.

Bansa lebas jaku

Bisi sebelas iti bansa lebas jaku ti bisi dikembuan kitai

                i.        Lebas jaku biasa

Nadai ngembuan isi ke menyana lalu enda tentu begunaka pengelandik siku- siku orang ti deka bejaku, dikena kitai maya ti bejaku besehari-sehari. Nadai leka jaku ti nyengala dikena bejuraika lebas jaku tu,jalai jaku iya mega muntang sereta mudah diperatika kitai. Nadai ngena jaku injau ti mayuh,enti lebas jaku nya formal iya dikena ba pengawa resmi lalu enti enda formal semina ngena jaku ti selalu dikena kitai maya ti bejaku besehari-sehari.

Chunto iya baka enti enda formal, kini dik kemari. Lalu enti iya  formal, kini ka penunga nuan kemari.

              ii.        Lebas jaku bedagang

Dikena ngenataika siti-siti pekara enggau nyemetak, lalu utai ti deka dipadah nya mesti dipejuraika enggau manah. Leka jaku ti dikena ba lebas jaku dagang tu muntang sereta mudah, enda beguna jurai iya enggau panjai. Jalai jaku mega enda tentu beguna ba lebas jaku tu.

Chunto: kedai Sasha bisi nyual mayuh bengkah perengka dapur, datai meh enggaika enda ampit.

             iii.        Lebas jaku sains

Jaku ti dikena ba lebas jaku sains iya nya baka jaku moden tauka baru, jaku ilmiah lalu enda ngena jaku ti dikena kitai besehari-sehari. Bisi ngembuan lebas jaku kediri empu, bisi mega ngembuan penteba baka akademik, sains sereta formal nitihka pansik sereta pekara ti udah dipansik orang ti suba. Bisi ngembuan jaku kangau kediri lalu mayuh ngena jaku nama enggau jaku pasif.lebas jaku sains tu mega ulih dipeda kitai ba lebas jaku fizik, biologi, kimia enggau teknologi.

Chunto: ’polimer sintetik’,’ion’,’molekul ion’ , ai (H₂O)- 2 leman Hidrogen + 1 leman Oxygen.

             iv.        Lebas jaku pengerembai berita

Lebas jaku tu dikena ngerembaika sereta nyampaika berita ngena jaku ti pemadu mudah ngagai peninga sereta orang ke macha. Nadai ngena jaku ti bebungai, lebas ti mega enda mansik jalai jaku enggau ti bukai enggau nyemetak.

Chunto: sehari tu bisi dua puluh iku orang ti bisi bebadi ba jalai alun.

              v.        Lebas jaku aum

Ngembuan mayuh bengkah batang penemu senentang siti-siti pekara ti dipejuraika. Gaya jaku ti dikena ba lebas jaku aum ti senang diperatika sereta enda ngembuan jaku ti mayuh bengkah.madah sesebengkah berita ngagai orang ke macha nya senentang sesebengkah pekara ti dipejuraika sida iya.

Chunto: aum kitai sehari tu senentang jalai ti belubang lalu jalai ngaduka pekara tu.

             vi.        Lebas jaku undang-undang

Teks jaku ti bisi besangkut paut enggau undang-undang sereta bisi penteba Kediri empu enggau mega bisi akta. Bisi ngembuan leka jaku Kediri empu ti mayuh nginjau ari jaku ribai. Jalai jaku ti dikena enda tentu dikirauka tang isi iya ke nyemetak ti diperatika enggau dalam agi dalam lebas jaku undang- undang tu. Nadai kar sereta gambar lalu jurai jaku ti digaga ba lebas jaku tu panjai.

            vii.        Lebas jaku pengarap

Bejuraika senentang pengarap siti-siti rban bansa ti diau di dunya tu. Semua pengarap enda sama chara pejurai iya enggau pangan diri. Lebas jaku tu bisi ngembuan bup kediri empu, jaku ti dikena maya ti bejuraika senentang pengarap tu enda tusah diperatika, kitai ulih nunda lebas jaku ti udah diajar ngagai  siti-siti bansa senentang pengarap bangsa nya.

          viii.        Lebas jaku main

Mantaika berita sereta ripot senentang main ti bisi dimainka siku-siku orang. Lebas jaku ti dikena, muntang sereta mudah diperatika kitai, enda ngena leka jaku ti panjai dikena meri ripot senentang main tu. Jalai jaku iya mega enda bangat mar diperatika kitai.

Chunto: rumah biru menang main bol ngelaban rumah merah.

             ix.        Lebas jaku sastera

Lebas jaku ulih diasilka ari peneleba sereta runding bepenemu senentang sastera. Bisi ngembuan jaku Kediri empu senentang sastera tu, reti ti dibantaika ngena chara sastera tu mega jauh limpang ari ti asal iya. Bisi ngembuan mayuh bengkah penteba ke bukai dalam lebas jaku sastera tu. Jaku ti dikena sida iya panjai sereta bebungai, utai ti disema iya disebut sida belebih- lebih. Lebas jaku sastera tu dikenataika ngena chara ti manah didinga kitai.

Chunto: pemajik gamal nuan baka senaya bulan pegari, perenching baka panchar mata panas.

              x.        Lebas jaku ekonomi tauka betanam betupi

Bisi ngembuan leka jaku Kediri empu, jaku ti dikena sida iya baka selama. Gaya sida iya mantaika jaku mega puntang sereta mudah diperatika kitai. Sida iya ngena jaku ti mudah diperatika orang ti ninga tauka macha bagi bengkah utai ti dipejuraika sida iya.

             xi.        Lebas jaku akademik

Lebas jaku tu iya nya lebas ke penudi ti bisi dipejuraika sereta dipansik kitai. Ngembuan batang penemu ti deka dibantaika tauka dikunsi enggau orang bukai. Lebas jaku tu bisi ngaga jurai ti dalam senentang pekara ti dikerandauka sida iya. Orang ti ngena lebas jaku tu enda tau enda orang ti bisi ngembuan penemu sereta landik.

karang ti dipilih lalu mansik pengalus jaku ti bisi dalam karang

Topik: saru pegai ulu duku

panchar mata panas pukul 8.30 pagi ensilup tama ngagai bilik mit aku mit. Nyepi diri berasai angat, aku nguji muka kulit mata begadai-gadai, naka meh penyilau dunya asai disepi aku laban senawah mata panas nya nisup nembam ba anak mata. Aku lalu ngereduas angkat lalu nyengkau radio sandik ba atas mija lalu nguingka pemulas radio nya ngagai stesen ke pemadu dikerinduka mensia mayuh jam ke diatu, dinga nyau rauh- rauh serak nyawa DJ Sigat Wit Malang betundi enggau bala peninga. Enda lama udah nya, seiti jaku gerah ditabur terus ari nengah gelumbang FM.

      “ Tu bisi jaku gerah ngagai semua nembiak ke benung nganti pemutus peresa pom lima tauka Sijil Pelajaran Malaysia (SPM). Pemutus peresa tu deka dikeluarka kena 16 mac 2005 iya nya hari satu. Bala kita tau ngabas pemutus peresa tu ba sekula diri empu berengkah ari pukul 10.00 pagi pagila....”

      Sepengudah mendingka jaku gerah nya, ati aku berengkah enda nyamai. Ulu ati asaika dientun- entun, bisi nya berasai takut, bisi nya sabar lalu bisi ga nya gagit. Mayuh macham Tanya bepeling ba kerubung pala. Kada pas meh tu? Nama meh penyadi enti aku pil? Kini meh penunga idup aku enti pil? Nyau baka leka ujan Tanya ke bedau besaut nujah pugu untak. Naka meh pengirau ati aku, siku nadai meh orang nemu.

      Tut...tu-tut..tu-tut!!! Ku munyi talipaun binching bemunyi sereta berapi ba atas mija ngagau madahka bisi orang ti ngagau. Aku ke benung ngantu ba komputer lalu beguai nguing ngagai mija mit ba tisi katil lalu nyengkau talipaun ti benung kekejat ba atas mija.

 “Halo!!!”. “Halo! Mang, nuan nya?” Au! Aku tu, sapa nuan deh?” “Mang, aku tu Chieminda, iga ga nuan ngenumu nya babo, nya baka besehari- sehari nuan ninga nyawa aku. Pagila SPM pansut, sereta tua ke sekula pagila au!” “Eh, enggai aku Chie, enda berani aku. Nuan aja meh medaka tua. Enda ibuh ke deka meda, tu tadi baru ninga jaku gerah ba radio aja buku tulang aku tu nyau asai ka tingkil. Kada pas tauka enda aku tu Chie? Kada ulih aku tu nitihka nuan nyambung ngagai pom enam?”  “ Apu.. anang mapap nuan Mang, tama tauka enda, nya dudi tua ngira. Aram meh, iga nuan tau buyan ke nya, keretas aja nya deh. Ni suba ambis tuchung bukit Santubung ditiki tua, enda patut ngabas peresa nuan takut. Aram meh Mang, nadai kaling aku.”

“ Minta ampun aku Chie, amat enda ulih aku enggau nuan. Bedau besedia aku.” “ Au meh, enda alah kempuk tanah seberai, enda alah tunduk enti nuan ga enggai.” “ Anang nyima Chie, nuan sigi pama enti udah besempama alah leka lagu sida Linda.

Hari ke dianti pan datai, aku nyau baka ukui ke labuh anak dani tumu pagi nya, ka kemi enda nyadi, ka bira enda ga nyadi. Mandi baka ngenchalka ai angat, bedau selampur tubuh basah, udah aku ngemansutka diri ari bilik ai. Puas ke dugau- dugau baka empelekung mabuk ampuh, dinga pintu tatuk ari luar. Nadai orang bukai mesti tu indai, ku atiku. Ba dunya tu semina indai ke siru ke aku. Apai... dini apai? Bisi baka ke nadai, kami nyau tebalan enggau rintai pejalai apai.

“ Tuju aja, enda dikunchi pintu nya” ku aku nyaut ari dalam. “ Mang lapa nuan lalu bedau begari? Nama nuan amat enda ke sekula ngabas peresa?” ku indai enggau sada nyawa ti siru nanya aku.

“ Legi meh indai, agi kesal aku tu” “ Anang telunga- lunga nuan Mang, enda sabar ati aku deka meda pemutus peresa nuan. Enti nuan takut tua ga sama kin legi”. “ Tau ga indai, nyangka enti nuan enggau aku, enda aku takut”, kua aku nyaut lalu beguai angkat muka jemari gari ngarika diri.

Datai ba penama sekula kami duai indai lalu terus nepatka papan notis ba ‘ Blok Pentadbiran.’ Aku enda kempang malik ngagai rintai nama diri ke dilekat ba dinding nya. Indai lalu mansang ke mua ngiga nama aku, giga indai ba rintai nama orang ke berurup’c’, udah nya baru iya tetemuka nama aku Christin anak Austin Junga. “ Mang!... Tabi puji ngagai nuan, anak...pas nuan!!!5A, 4B” ku indai merap aku enggau ai mata gaga merejui ba kuyu iya ti nyau manggai 48 taun.

“ Pas aku indai?? Terima Kasih ngagai Petara”, ku aku enggau sabak-sabak. Beberap meh kami duai dia enda pedulika orang ti sama bepedaka pemutus peresa sehari nya, pengajar Jenny ti bediri enda jauh ari kami tuchum meda ulah kami duai indai. Aku ulih ngasai pengaga ati indai, iya meh ke tiang semengat aku ngelama tu. Enti enda ari sukung, ari pejal indai nyangka enda datai ba tikas tu aku. Apai...udah lama aku enda betemu enggau tukuh lelaki ti dikangau apai. Udah dua minggu aku enda meda senaya iya, sepemulai iya ari KL ngetu dua hari aja nukar gari udah nya nurun baru ke Labuan laban bedau sempat aku ngerandau iya. Enti ba rumah, apai seruran ngurung diri ba bilik bacha iya empu, ngatu komputer ngereja pengawa opis iya ti enda nemu abis-abis. Lebuh kami semadi sebana ngagai indai, indai meruan nyangkung apai. Indai madah apai ngawa ngiga duit kena melanja kitai sebilik awak ulih meli rumah besai, nyegula kami ngagai universiti. Apai baka ke enda peduli ke kami, kada kala apai lelengauka kami menyadi. Lebuh ngingatka apai ati aku asai ke disayat semilu.

“ Mang nyin apai udah datai, padahka iya pemutus peresa nuan kemari.” “Jampatka, enda kala apai nuan pulai ngenumu tu”. “Au idai”, ku aku enggau serengut nyawa ti begadai. “Pai aku bisi..” “Anang guai mantai utai bansa nya, agi lelak aku tu” ku apai ngelampat jaku aku ke agi memekang. Apai lalu beguai angkat niki tangga bilik seduai indai ba sadau lalu enda malik ke aku ke mengkang kiting-kiting megai slip SPM. Ati aku chukup bepedi meda ulah apai baka nya, nyentuk endar ati apai ngagai aku baka tu. Nama apai udah enda sayau ke aku agi? Enda berasai ai mata nyau bekeberai neriti kuyu, aku nyau ensedan nyabak ba bau indai.

“Mang, nyambung sekula baru nuan?” ku Jang nanya,enda nemu kemaya mua iya enchengul ba mua pintu. “Au, enti enda sekula baru nama pengawa aku ba rumah tu deh? “Nadai alah ngibun rumah puang tu aja”. Mang lalu nyambung sekula iya ngagai pom enam begulai enggau pangan iya ti bukai. Apai iya agi baka selama, nadai ngirauka sida semadi, iya semina ngirum duit ke belanja sida iya aja.

Ukur pengalus jaku dalam raban kitai iban

Nitihka Lakoff (1975), pengalus jaku iya nya pengawa ti nyeliah pengawa besengki runding enggau laya dalam interaksyen.universiti Sumatera Utara madahka pengalus jaku nya sekeda apak ti ulih ngangkatka pengelandik jaku orang ti benung berkomunikasyen, orang ke bejaku enggau orang ke mending ukai semina dipinta madahka pengamat tang patut ngembuan pengakun ati dikena nyaga pengelikun diri enggau orang bukai.

Kitai iban bisi ngembuan mayuh pengalus jaku ti enda tau enda ditemu kitai sereta diperatika kitai enggau lenak agi.

Entara pengalus jaku ti bisi dikembuan kitai iban iya nya baka enda tau nelah nama entua, enda tau changka enggau utai orang, ngemunka pengelikun diri, ruang bilik enggau menua, bebasaka orang bukai tauka orang tuai, basa dikelala ari jaku lalu iban dikelala ari penyiru, mending sereta ngasika jaku apai indai, ngena jaku sempama, bebasaka temuai datai enggau ti bukai.

Iya ti keterubah enda tau nelah nama entua. Dalam pengarap kitai iban, menantu enda tau nelah nama entua enggaika tulah. Sida enta tau begendangka nama entua peneka ati sida, semadi meh enti bisi pengawa ke beguna bendar ti ngasuh iya nyebut nama entua iya. Reti iya kitai tau nyebut nama entua kitai ba pengawa ti bebatang aja asalka kitai enda begendangka nama sida besehari-sehari.

Kelimpah ari nya, kitai mega diajar enda tau changka enggau utai orang. Maya ti ngena barang orang bukai, kitai enda tau enda nyaga barang nya enggau manah ngambika enda lenyau tauka jai. Kitai iban mega dilalau ngemunka pengelikun diri, ruang bilik enggau menua kitai. Kitai sigi dilalau nyaga pengelikun diri, ruang bilik enggau menua ngambika kitai ulih idup enggau nyamai.

Nambahka nya, kitai mega diajar bebasaka orang tuai tauka orang bukai, bansa dikelala ari jaku lalu iban dikelala ari penyiru. Nya kebuah tiap iku kitai enda tau enda bebasaka orang bukai dalam pengidup kitai. Penyiru kitai bejaku enggau sida nunjukka kitai nya bebasaka sida iya.kitai mega dilalau mending sereta ngasika jaku apai indai. Kitai enda disagi mantah jaku sida iya enggaika kitai kena tuntung penusah. Kebuah pia laban apai indai nya meh orang ti ngadaka kitai lalu sida iya nemu nama utai ti manah ke kitai.

Pia mega kitai mega diajar sereta dilalau bebasaka temuai ti datai. Enti bisi temuai ti datai ngagai rumah kitai, kitai enda tau enda ngenah iya enggau semua utai ti kemisi kitai. Temuai ti datai enda tau enda ditunga enggau manah ngambika sida enda lembau nemuai agi ngagai rumah kitai.

Mansik pengalus jaku ti bisi dalam karang

1.    Bebasaka orang ti tuai enggau orang bukai

Ngena jaku kangau enggau diri sebilik tauka orang bukai

Apai, Indai, jang, mang, aka enggau pengajar Jenny.

2.    Ngena jaku sempama maya ti bejaku

enda alah kempuk tanah seberai, enda alah tunduk orang ti enggai, ukui ke labuh anak, empelekung mabuk apuh, tiang semengat enggau disayat semilu.

3.    Mending sereta ngasika jaku apai indai

 “anang telunga-lunga nuan mang”. “tau ga indai”.

 “jampatka, enda kala apai nuan pulai ngenumu tu”. “au indai”.

  “pai, aku bisi..” “anang guai mantaika utai bansa nya”.

4.    Ngena patah nyawa ti baruh lebuh ti bejaku enggau diri sebilik sereta orang bukai sereta mantaika jaku ti manah

 Nama nuan amat enda ke sekula ngabas peresa nuan, ku indai enggau sada nyawa ti siru.

Minta ampun aku Chie, amat enda ulih aku enggau nuan.

Tabi puji ngagai nuan anak .

Terima kasih ngagai Petara.

5.    Ngemun sereta rinduka diri sebilik enggau orang bukai

Indai merap aku enggau ai mata pengaga merejui ba kuyu.

Beberap meh kami duai dia enda pedulika orang bukai.

Meda mua indai, majak sinu ati aku.

Indai meruan nyangkung apai.