MORFOLOGI JAKU IBAN

DEFINISYEN MORFOLOGI

Morfologi nya siti ari apak pengelandik ti mansik senentang tukuh leka jaku. Leka jaku morfologi nya diambi ari apak biologi ti ngemai reti tukuh jelu enggau utai tumbuh. Tukuh bentuk nya diserap ngagai tukuh leka jaku mensia.

Morfologi nya sesebengkah bansa jaku nya jalai nempa leka jaku, bisi sekeda leka jaku di dunya tu sebaka jalai  nempa leka jaku lalu bisi mega bebida. Bisi sekeda jaku ngena chara meri penambah ngagai urat jaku lalu bisi mega ngena chara ngubah tukuh dalam    leka jaku nya empu baka jaku Arab. Nyadi morfologi jaku iban nya bidang  penemu ti betungkapka struktur, tukuh enggau raban jaku.

Iya endang siti bidang ti kompleks lalu tau dipeda nyadika jalai ti besabungka kaul sintaksis enggau fonologi jaku. Morfologi dikumbai bekaul enggau pansik munyi sebut jaku laban iya ngemeratka pansik pasal gaya leka jaku ti datai ari munyi sebut. Iya bekaul enggau pansik sintaksis laban ari leka jaku iya tau didijir nyadi frasa, klausa enggau ayat ti mai reti. Kitai mega deka beratika pansik jalai jaku berengkah ari konstituen ti pengambis mit dalam atur jalai jaku ti tau dikena nempa leka jaku sereta bisi mai reti ti meruan sereta menyana.

Pekara ti deka dipansik enggau lenak dalam morfologi ba kereja kus tu iya nya senentang tukuh leka jaku iban enggau mega kelas leka jaku iban. Dalam kereja kus tu deka mansik enggau lenak agi pekara ti bisi ba dua bengkah pekara nya.

Tukuh leka jaku iban

Tukuh leka jaku tunggal

Jaku tunggal enti diperatika ari patah sebut, tau ngunda siti patah sebut tauka lebih. Pia mega dalam siti patah sebut nya tau dipenyadi ari siti vokal (V) aja, tauka siti vokal (V) nya disempulang enggau konsonon (K). Konsonan nya tau datai ari mua vokal tauka belakang lalu tau mega seretai. Dalam jaku Iban, leka jaku ti pengambis pandak semina bisi nyadi berindik ari siti vokal enggau siti konsonan enggau dua iti vokal ti datai seretai. Ambika chunto baka au (VV), ti (KV), bah (KVK) lalu mega enggau ti ke bukai.

Tukuh leka jaku tunggal nya mega semua leka jaku dalam jaku Iban ti nadai nerima penambah tauka nadai nengah proses beturu tauka betanduka leka jaku nya disengkaumka magang dalam tukuh leka jaku tunggal.dalam jaku tunggal, taja pan ketebal agi nadai nerima penambah baka tu, nyin, nya, ditu enggau ti bukai, tang bisi sekeda jaku tunggal dalam jaku Iban bisi pengentap lalu ulih ngerembai agi nyadi jaku tumbuh.

Jaku tunggal nya tau dibagi ngagai beberapa bagi, iya ti keterubah iya nya jaku tunggal siti patah sebut. Penyampau jaku tunggal siti patah sebut dalam jaku iban endang mayuh. Sekeda leka jaku nya tau datai ari jaku injau baka jaku Melayu, English enggau jaku ti ke bukai mega. Dalam jaku tunggal siti patah sebut, bisi 8 iti pola sakum konsonan vokal iya ti ulih dipeda kitai enggau lenak agi.

Pola sakum konsonan vokal dalam jaku tunggal siti patah sebut enggau chunto ti engkeman
1)    VV	Au, ai, oi enggau ti bukai.
2)    KV	Wi, ke, ju, tu, ti enggau ti bukai.
3)    VK	It, as ( ari jaku injau).
4)    KVK	Bah, sen, sah, kah enggau ti bukai.
5)    KKVK	Star, draw, chak, enggau ti bukai.
6)    KVKK	Zink, rock, bank enggau ti bukai.
7)    KKKV	Skru,
8)    KKKVK	Straw, strum, screw enggau ti bukai.

Kar perugan 1: Jaku tunggal siti patah sebut

Pola sakum berengkah ari lumur 5 sampai 8 nya ngambi ari jaku orang bukai lalu tau mega dikumbai kitai jaku injau. Dalam jaku Iban ke bendar, nadai bisi pola sakum ti datai ba sakum ari lumur 5 sampai 8 nya tadi.

Jaku tunggal mega ulih datai dalam dua patah sebut, lalu jaku Iban tebal agi datai ari leka jaku dua patah sebut tu. Sekeda pola dalam jaku tunggal nya ulih dibagi kitai ngagai 12 iti bagi.

Pola sakum jaku tunggal dua patah sebut besereta enggau chunto
1)    V + KV	Auh, aum, iar, ias, ais enggau ti bukai.
2)    V + KV	Aku, aki, ini, adi, ila, iri, ipa enggau ti bukai.
3)    V + KVK	Akih, akan, iran, ikan, utan enggau ti bukai.
4)    VK + KV	Ampa, anti, intu, empa, antu enggau ti bukai.
5)    VK + KVK	Untak, indik, antah, ansah, empat enggau ti bukai.
6)    KV + V	Sua, dia, kia, pia, tua, mua enggau ti bukai.
7)    KV + VK	Baur, tuat, pait, kait, jait, buan enggau ti bukai.
8)    KV + KV	Kita, jala, sera, jera, kami enggau ti bukai.
9)    KV + KVK	Bakul, mulut, jarum, kepit, getil enggau ti bukai.
10) KVK + KV	Samba, tanju, tampi, timba enggau ti bukai.
11) KVK + KVK	Lambar, gambar, sambal enggau ti bukai.
12) KV + VV	Biau, tuai, diau enggau ti bukai.

Kar perugan 2: Jaku tunggal dua patah sebut

Jaku tunggal mega tau datai ari jaku akronim iya nya kedut ti dipenyadi ari urup pun leka jaku tauka sakum patah sebut ti keterubah ari dijir siti rambai jaku, disebut lalu ditulis nyadi siti leka jaku ti entap sereta menyana. Ambika chunto baka SIDS (Serakup Indu Dayak Sarawak), palamen (palan latih nembiak), Bernama (Berita Nasional Malaysia) enggau ti bukai mega.

Ulih disimpulka ditu, jaku tunggal nya ulih datai ari siti patah sebut, dua patah sebut tauka sakum konsonan vokal ti ke bukai. Pia mega dalam jaku tunggal tu mega bisi jaku akronim iya nya siti proses ngedut lalu besakumka leka jaku ngambika iya muntang agi disebut.

Tukuh leka jaku tumbuh

Jaku tumbuh nya tukuh leka jaku ti diasilka ngena prose sari meri penambah ngagai urat jaku. Proses meri penambah nya tadi ngasilka tukuh jaku ti ngunjungka tumbuh leka jaku baru ti entap agi sereta beguna dalam jaku Iban. Tebal agi, leka jaku ti nerima penambah nya morfem meras lalu penambah nya morfem berikat. Chunto jaku tumbuh ti datai ari urat jaku tauka morfem meras iya nya baka be + jala (bejalai), eng+kasak (engkasak) enggau ti ke bukai mega. Penambah nya tukuh morfem ti enda ulih bediri Kediri dalam ayat, reti nya iya mesti disakumka enggau urat jaku. Belalau ari nya, penambah tau dibagi ngagai empat bengkah iya nya penambah mua, belakang, kepit enggau selit.

Jaku tumbuh bepenambah mua nya tau datai dalam jaku nama tumbuh, jaku pengawa enggau jaku adjektif. Ambika chunto baka ba dalam jaku nama baka penambah ‘pe’ ba pematak, pemansang, pemungkal, peniki enggau ti bukai, ‘penge’ tau dipeda ba pengebom, pengetan, pengenyai enggau ti bukai mega lalu mayuh chunto penambah mua ti ke bukai.

Jaku tumbuh ti datai ari jaku pengawa iya nya baka penambah ‘me’ ba melandi, menanyi, merarau, enggau ti bukai, penambah mua ‘nge’ ba leka jaku ngechat, ngetar, ngemit, ngerat enggau ti bukai. Lalu penambah mua jaku tumbuh ba jaku adjektif iya nya baka ‘nge’ ba leka jaku ngeninggi, ngemesai, ngenangi, ngemata, enggau ti ke bukai.

Kelimpah ari nya, ba apak jaku tumbuh bepenambah belakang ba jaku Iban iya semina bisi ba jaku pengawa tumbuh aja lalu penambah belakang ba jaku Iban semina siti leka jaku aja iya nya. Ambika chunto baka madahka, mantaika, ngemeratka, ngesaika, ngemaruhka enggau ti ke bukai. Dalam jaku Iban, nadai penambah belakang ti ke bukai.

Nambahka nya, penambah ba jaku tumbuh tu mega ulih dipeda ari penambah selit. Dalam penambah nya, leka jaku Iban ti betukuhka selit tu mimit aja ditemu dikena ba jaku Iban. Jaku tumbuh selit tu mega semina bisi ba jaku nama enggau jaku adjektif. Ambika chunto ba jaku nama iya nya penambah selit –le- ba kelemayang, kelebembang lalu penambah selit –er- ba serabut enggau berigi. Lalu pia mega, ba jaku adjektif iya bisi penambah –be- ba jaku teberunsai teberingkas, tebererak, teberayan enggau ti ke bukai.

Penambah ti kepenudi ba jaku tumbuh iya nya penampah bekepit. Penambah kepit ba jaku tumbuh dalam jaku Iban semina datai dalam jaku pengawa. Penambah kepit nya ngemai reti penambah ari mua urat jaku enggau ari belakang urat jaku mega. Ambika chunto , dalam penaambah kepit ti baka melakangka (me...ka), tepantapka (te...ka), dikemeranka (di..ka) enggau chunto ti ke bukai mega ba penambah bekepit ba jaku tumbuh ti datai ari jaku pengawa.

Tukuh leka jaku turu

Proses beturuka leka jaku nya proses ti bedijirka dua urat jaku tauka lebih lalu tukuh ke nydi nya mai reti  ti entap agi sereta lebih menyana agi reti iya.  Jaku turu disepil beserara taja pan iya bisi ngundan dua iti tukuh leka jaku. Pengudah ti nyadi proses beturukan leka jaku dia iya beserakup lalu nyadi siti unit ti bisi ngemai reti, iya nya tukuh ti enda ulih nerima sebarang leman bukai tauka leka jaku bukai ti diselit entara unit nya dia.

Sebedau nengah proses beturuka leka jaku nya, iya endang bisi ngemai reti iya Kediri empu. Kebuah pia, laban beturuka leka jaku tu begunaka dua leman urat jaku ti bebida lalu ngemai reti ti ke baru tauka lebih entap agi. Ambika chunto baka leka jaku gerai nyamai. Enti dipeda Kediri, gerai nyamai nya bisi ngundan reti Kediri empu, baka gerai nya ngemai reti tubuh orang ti bepengerai, nadai sakit apa nama. Lalu reti nyamai nya sekalika nunjukka pengidup orang nya senang, nunjuk ngagai utai ti muntang dikereja, nunjuk ngagai utai ti diempa nyamai enggau reti ti ke bukai. Lalu pengudah ti nengah proses beturuka leka jaku, dia reti gerai nyamai nya ngemai reti tubuh orang ti nadai sakit, dia kitai meda iya nunjuk ngagai siti reti nya aja lalu nadai reti ti ke bukai ti ulih diengkahka kitai pia aja ba rambai jaku nya.

Dalam jaku raban kitai Iban, tukuh jaku turu endang iya sigi mayuh dikembuan kitai raban bansa Iban. Iya ulih dipeda sekalika dikena kitai bejaku besehari- hari, dalam adat enggau leka main lalu tau mega dipeda kitai ba apak ti ke bukai mega. Jaku nama turu ti bisi dikembuan kitai Iban tau dibagi ngagai tiga bengkah.

Bagi ti keterubah iya nya jaku nama turu ti datai ari rambai jaku meras. Dalam sitak tu mega, bisi disengkaumka enggau tukuh jaku ti dikena meri tanda pangkat, gelar tauka ensumbar. Semua nya disengkaum dalam jaku turu ari rambai jaku meras kekerubah tu. Ambika chunto baka datai ari rambai jaku meras iya nya baka leka jaku kar perugan, kereban tulis, jalai alun, asi pulut enggau ti bukai mega.

Ba jaku turu rambai jaku meras tu, iya nunjuk ngagai siti reti aja, baka jalai alun ti nunjukka jalai ti endur entukar bejalai lalu jalai alun tu mayuh agi dipeda kitai digaga orang ba mengeri. Iya nadai ngemai dua tiga reti. Lalu enti dipeda kitai ba apak dikena meri tanda pangkat, gelar tauka ensumbar. Ambika chunto Kepala Menteri, Tuai Rumah, Kepala Pengajar dikena nunjukka pangkat siku-siku orang nya. Ba gelar baka Bujang Berani, Bujang Sigat, Bujang Lembau, Dara Imun, enggau ti ke bukai mega.

Lalu ba ensumbar iya nya baka dara imun likun pendiau, tuchun nyingkum semampai digalau nyadika tengau, ngembuan jayau batu bulan. Endu dara menti pengibun semua orang. Endu Dara Rimbu bejaku siru ngasuh lantang, bujang berani nyelangking kijang, batu timah betatah bangkang. Berangai besai pengundan penemu nadai ke timpang. Apai Sala Muda alai nyanda semua barang, lelunyit tampun puji, Singgai menyawai besi berani. Ngembuan ati mutus kempang ngansak nembiak nganaka ensera leka timang enggau mega ensumbar ti ke buaki. Dalam pengidup kita iban, endang mayuh gelar enggau ensumbar ti bisi dikembuan kitai. Gelar tauka ensumbar nya ngayanka gaya pendiau siku- siku orang nya. Enti iya berani, iya lalu digelar orang bujang berani enggau ti ke bukai mega. Semua gelar enggau ensumbar nya endang iya bisi ngembuan reti magang.

Bagi ti kedua dalam jaku turu tuuu iya nya ti betukuhka terminologi. Bertukuh terminologi tu mega tau dikumbai kitai ti betukuhka ilmu. Betukuhka ilmu tu reti iya, leka jaku nya dikena ba sekula nyadika siti utai ti dipelajarka bala nembiak, sekalika nya ba tikas sekula tauka ba tikas ti ke tinggi agi. Leka jaku turu ti betukuh terminologi tu nadai dikena ba jaku selama iya nya jaku ti dikena kitai bejaku enggau pangan diri besehari- sehari.

Tukuh leka jaku tu enda ulih dikena sengapa. Orang ti ulih ngena jaku turu ti betukuh terminologi tu semina orang ti bisi pengelandik enggau pemandai sereta ngembuan penemu ti chukup. Ambika chunto baka model linear, segi tiga, atur chara, keretas kereja enggau ti bukai. Orang ti nadai ngembuan penemu enda nemu nama utai ti bisi ba jaku turu ti bertukuh terminologi tu.

Bagi ti ketiga dalam tukuh jaku turu tu iya nya jaku turu ti ngemai reti sempama. Lalu ba jaku turu tu mega ulih dibagi ngagai ti bengkah mega. Bagi ti keterubah iya nya, jaku turu betukuh sempama ari jaku turu kelaung. Jaku turu kelaung tu ngemai reti ngelaungka utai ti deka disebut kitai nya. Mayuh bengkah utai ti ulih dikelaungka ba raban bansa kitai iban, kelebih agi orang ke menya.

Jaku kelaung tu sekalika dikena ngelaungka orang, ngelaungka pengawa tauka ulah, ngelaungka utai ti deka disebut kitai. Jaku kelaung tu beguna amat kelebih agi ba menua ti agi bedau latung, ba menua nya, jaku ti deka dikenataika kitai nya enda tau disebut terus tang ngena jaku kelaung ngambika enda meri penusah ngagai orang ti ba menua nya. Ambika chunto jaku kelaung baka matahka jari, nepuk asap, betubuh bisi, ati hari enggau ti bukai mega.

Bagi jaku turu ti mai reti sempama ti kedua iya nya jaku turu silup.  Jaku turu silup tu iya nya nunjuk ngagai ulah tauka pengawa ti dikerejaka siku- siku orang nya. Jaku turu silup tu lebih agi nunjuk ngagai ulah mensia sekalika ulah sida iya nya manah tauka jai. Semua nya ulih disempamaka orang ngena jaku silup ti bisi dikembuan kitai raban bansa iban. Kitai iban endang kaya enggau jaku, nya kebuah mayuh bansa jaku ti ulih dikena kitai kemaya ari diatu laban ti udah dipunka aki ini kitai menya. Ambika chunto ba jaku silup tu iya nya baka panjai jari, pandak runding, rangkai jaku, makai angin enggau ti ke bukai mega.

Bagi ti ketiga ba jaku turu sempama tu iya nya jaku turu ba apak sema banding. Sema banding tu baka nyema ke dua bengkah utai ti bebida. Jaku sema banding tu nyemaka utai baka nyema ke ulah mensia, pengidup kitai enggau ti bukai mega. Semua utai ulih disemaka ngena jaku sempama ari apak sema banding tu.

Maya bekenaka leka jaku sema banding tu, ba mua leka jaku nya bisi ngemai leka jaku baka, munyi, enggau asai. Tiga leka jaku nya tadi nunjukka utai ti deka disemaka ba leka jaku nya. Ambika chunto leka jaku sema banding iya nya baka mayau enggau cit, munyi burung makai buah kara, asai ke pansut ari nyawa baya, baka ukui labuh anak enggau ti ke bukai mega.

Bagi ti kepenudi ba jaku turu ti mai reti sempama tu iya nya jaku turu banding. Ba jaku turu banding tu. Ba jaku turu banding tu mega lebih kurang sama enggau jaku turu sema banding. Ambika chunto ba leka jaku turu banding tu iya nya baka nya, baka tu, baka nyin enggau baka ni. Ba jaku turu banding tu iya nya ba pun leka jaku iya nya baka ti nunjukka ngagai banding ti dikena mandingka sesebengkah utai.

Leka Jaku Betandu

Proses betanduka leka jaku dalam jaku Iban nya proses ti betanduka urat leka jaku. Dalam proses tu, urat leka jaku nya tau betandu penuh, betandu setengah tauka betandu sebagi ba patah sebut dulu tauka dudi, enggau betandu urat leka jaku lalu sekeda besukung engggau penambah tauka nadai bepenambah. Dalam jaku Iban bisi empat bengkah tukuh jaku betandu ti deka dipejuraika aku enggau lenak agi.

Tukuh leka jaku betandu ti keterubah iya nya jaku betandu patah sebut dulu. Ba jaku betandu patah sebut dulu tu iya nya tukuh ti betandu ba patah sebut dulu kelebih agi ba tukuh jaku adjektif. Jaku betandu patah sebut dulu tu ngemai reti betandu ba pun leka jaku nya aja. Ambika chunto baka leka jaku besai- besai nyadi bebesai, dugau- dugau nyadi dedugau, degi- degi nyadi dedegi enggau ti bukai. Pengudah ti nengah proses betandu ke patah sebut dulu, dia tanda sekang ba leka jaku nya lalu ditingkilka tauka dibuai.

Bagi ti kedua iya nya jaku betandu penuh ti ngemai reti tukuh leka jaku nya dikena beulang- ulang. Reti beulang nya iya, sepil leka jaku ba dua bengkah leka jaku nya sama sekali tauka sebaka enggau pangan diri. Jaku betandu penuh tu kelebih agi datai ari jaku pengawa, jaku nama rama, jaku adjektif enggau jaku tugas. Empat bengkah bagi jaku nya tadi bisi ngembuan jaku betandu penuh tu. Ambika chunto baka, bagas nyadi bagas- bagas, gama nyadi gama- gama, dugau nyadi dugau- dugau enggau leka jaku ti ke bukai mega kelimpah ari chunto ti diberi nya.

Iya ti ketiga iya nya jaku betandu urat jaku iya nya tukuh leka jaku ti betandu ba urat leka jaku. Dalam jaku betandu urat jaku tu ulih dibagi ngagai dua pola. Pola ti keterubah iya nya pola jaku betandu urat jaku ti betukuhka jaku pengawa. Ambika chunto baka lubah nyadi belubah- lubah, dugau nyadi dedugau- dugau enggau ti ke bukai mega. Pola ti kedua iya nya pola jaku betandu urat jaku ti betukuh jaku adjektif. Ambika chunto baka mar nyadi mar- semar, jai nyadi jai- sejai enggau ti bukai. Taja pan iya bisi nerima penambah, penambah nya enda disemgkaum ditandu ba apak betanduka urat jaku tu. Semina urat jaku iya aja ditandu ba leka jaku nya.

Bagi ti kepenudi ba tukuh jaku betandu tu iya nya jaku betandu patah sebut dudi. Jaku betandu patah sebut dudi tu ngemai reti jaku nya betandu ba patah sebut dudi leka jaku lalu ketebal agi iya nya betukuhka jaku adjektif. Ambika chunto baka pemajik nyadi pemajik- majik, pemanah nyadi pemanah- manah, pemar nyadi pemar- mar enggau ti bukai mega. Ulih dipeda kitai dia, jaku ti betandu semina ba leka jaku ti ke dudi aja. Iya enda nandu semua leka jaku nya baka iya ti ke dulu agi.

Nyadi empat bengkah nya tadi mih tukuh jaku betandu ti bisi ba jaku iban. Kitai iban ngembuan mayuh jaku betandu ti dikena kitai bejaku enggau pangan diri besehari- hari. Bansa jaku betandu nya mega ulih dipeda sekalika betanduka urat jaku, betandu patah sebut dudi enggau ti bukai mega. Ari nya kitai ulih meda, kitai bansa Iban endang kaya enggau mayuh bansa gaya jaku. Tukuh jaku betandu nya tadi ulih dipeda ba jaku nama, jaku pengawa, jaku adjektif enggau jaku tugas. Dalam empat bengkah jaku nya bisi tukuh jaku betandu. 

Kelas leka jaku Iban

Kelas leka jaku nama

Kelas leka jaku nama nya ngundan jaku nama nyadi leman teras iya tauka pugu ba kelas jaku nama nya. Semua leka jaku ti ulih nyadi leman teras tauka pugu iya disengkau magang dalam kelas jaku nama. Iya disengkaum enggau kelas jaku nama enti leman pugu nya bisi ba pasuk rambai jaku nama ti selalu dikena nyebut orang, endur tauka nama utai bukai. Nyadi kelas jaku nama tu ulih dibagi tauka dipechahka ngagai tiga apak nitihka penteba semantik iya nitihka bagi kelas jaku nama.

Bagi ti keterubah ba kelas jaku nama iya nya jaku nama menyana, ti ngemai reti ti dikena nyebut nama menyana lalu ba pun iya ditulis ngena urup besai. Semina ba pun leka jaku aja ditulis ngena urup besai, enti iya enda ditulis ngena urup besai iya ukai dalam kelas jaku nama menyana tu. Ambika chunto baka nama orang “Jonathan”, ba pun leka jaku nya iya nya urup “J” ditulis ngena urup besai.

Jaku nama menyana mega dibagi ngagai dua raban iya nya jaku nama menyana idup enggau jaku nama menyana ukai idup. Ba dalam jaku nama menyana idup, iya bisi dua bagi iya nya jaku nama menyana idup mensia enggau jaku nama menyana idup ukai mensia. Ambika chunto ba jaku nama menyana idup mensia baka ba nama orang iya nya Monica, Rentap, Libau enggau ti bukai. Lalu chunto ba jaku nama menyana idup idup ukai mensia iya nya baka bansa jelu, bansa bungai, utai tanam enggau ti bukai. Ambika chunto baka Mayau, Uduk, Cangkuk enggau ti bukai mega.

Ba bagi ti kedua ba dalam jaku nama menyana iya nya jaku nama menyana ukai idup. Ba jaku nama menyana idup tu, iya kelebih agi dikena nunjuk ngagai endur tauka nama sesebengkah endur nya. Iya mega tau nunjuk ngagai utai bukai, baka perengka ti dikena kitai besehari- hari. Semua nya disengkaum magang dalam jaku nama menyana ukai idup. Ambika chunto baka Polis Diraja Malaysia, Kuala Lumpur, Jalai Bleteh, Nanga Anchau engggau ti bukai mega ti bekaul enggau jaku nama menyana ukai idup. 

Kelimpah ari nya, ba kelas jaku nama mega ti ulih dipeda kitai iya nya jaku nama rama. Ba apak nya, iya ngemai reti leka jaku ti dikena nyebut nama bengkah utai tauka perkara rama ti bisi ngembuan gaya ti betukuhka rama. Nitihka bup sereba reti, rama nya ngemai reti utai ti diasaika semua tauka ketebal agi orang, endur tauka sesebengkah utai.

Jaku nama rama mega dibagi ngagai dua bengkah iya nya jaku nama rama abstrak enggau jaku nama rama konkrit. Ba jaku nama rama abstrak, iya ngemai reti konsep abstrak tauka utai ti betukuhka nama utai. Iya nya selampur aja. Ambika chunto baka semengat, peneka, pengidup, pemandai enggau chunto ti bukai. Leka jaku nya endang selalu dikena kitai bejaku enggau pangan diri besehari- sehari. Lalu ba jaku nama rama konkrit, iya nya jaku nama ti ngemai reti utai ti nyata nyengenda. Ambika chunto baka ambai, polis, ukui, tajau enggau ti bukai mega. Bida jaku nama rama abstrak enggau konkrit iya nya, ba abstrak utai nya enda ulih dipeda tang ba jaku nama rama konkrit utai nya ulih dipeda.

Iya ti kepenudi ba kelas jaku nama iya nya jaku ganti nama. Jaku ganti nama tu ngemai reti dikena nganti nama sesebengkah utai nya enggau leka jaku ti ke bukai enggau engkeman. Ba dalam jaku ganti nama tu ulih dipeda ari dua bagi iya nya jaku ganti nama tunjuk enggau jaku ganti nama diri. Ba jaku ganti nama diri, iya mega sereta nyengkaum enggau jaku ganti nama diri Tanya enggau jaku ganti nama diri orang. Ba dalam jaku ganti nama diri orang mega kitai ulih meda bagi iya baka iya ti kesatu,kedua, ketiga enggau beempu. 

Ba dalam jaku ganti nama tunjuk iya nya nunjuk ngagai sesebengkah utai tauka pekara. Ba dalam jaku raban bansa kitai Iban, jaku ganti nama tunjuk semina bisi tiga bengkah aja. Iya keterubah iya nya “tu” ti nunjuk ngagai utai ti ditegu tauka utai ti benung disebut. Iya ti kedua iya nya “nya” ti dikena nunjukka pekara ti bekaul ti benung disebut tauka nunjukka ngagai utai ti semak ba iya dia. Jaku ganti nama tunjuk ti kepenudi iya nya “nyin” ti dikena nunjuk ngagai utai tauka pekara ti jauh tauka pekara nya nyata bendar beseraka enggau pangan diri.

Lalu ba jaku ganti nama diri ari apak jaku ganti nama diri tanya iya nya bekaul enggau pekara ti dikena nanya sesebengkah utai, pekara tauka mensia. Ba jaku ganti nama diri tanya bisi tiga bengkah bagi iya nya “sapa” ti dikena nanya nama orang, “nama” ti dikena nanyaka nama utai tauka pekara enggau”ni” ti dikena nanya bagi orang tauka bansa utai. Ambika chunto baka ba “sapa”, sapa indu dara ke baru tama ngagai sekula kitai tu?.

Iya ti kedua iya nya jaku ganti nama diri orang ti semina nunjuk ngagai mensia aja lalu nadai nunjuk ngagai uati bukai. Ulih dipeda kitai ari empat bagi iya nya kesatu, kedua, ketiga enggau beempu. Ulih dipeda ba kar perugan di baruh tu.

Jaku ganti nama diri orang kesatu	Dikena nganti nama orang ti benung bejaku. Chunto: aku, kami, kitai. Aku deka makai.Iya enda nyebut nama iya tang nganti nya enggau ‘aku’
Jaku ganti nama diri orang kedua	Nganti nama orang ti enggau berandai. Chunto: nuan, seduai, kita. Nyadi “nuan” pulai maya gawai ila?
Jaku ganti nama diri orang ketiga	Nganti nama orang ti dikenang tauka disebut lebuh dua iku orang benung berandau. Chunto: iya, sida. “sida” sebilik kereja perintah magang.
Jaku ganti nama diri orang beempu	Nganti nama orang ti empu utai. Chunto: kendua, kenduai, enggiya. “enggiya” empu umai ba tanah nya.

Kar perugan 4: jaku ganti nama diri orang.

Kelas Leka Jaku Pengawa

Ba dalam kelas leka jaku pengawa tu, iya mega nyengkaum sekeda urat jaku ti tau nyadi leman pugu ba dalam pasuk rambai jaku pengawa. Urat jaku nya iya nya leka jaku nya empai tauka nadai nerima sebarang penambah tang ulih dipasukka ba rambai jaku pengawa.

Kelas jaku pengawa tu mega dibagi ngagai dua raban iya nya jaku pengawa transitif enggau jaku pengawa ukai transitif. Lalu ba jaku pengawa transitif, kitai ulih meda ari apak pasif enggau aktif. Pia mega ba jaku pengawa ukai transitif, ulih dipeda enggau lenak agi ari apak bepenembu enggau nadai bepenembu.

Ba bagi jaku pengawa transitif nya ngemai reti jaku pengawa nya nerima penyabut ti entudi enggau iya, ti disebut enggau leka jaku ‘objek’. Objek nya neguhka agi sesebengkah pekara ti dikenataika siku- siku orang nya enggau lenak agi. Iya mega ulih dipeda ari dua raban iya nya jaku pengawa transitif aktif enggau jaku pengawa transitif pasif.

Ba jaku pengawa transitif aktif, iya nunjuk ngagai jaku pengawa ti bisi nerima penambah ba mua urat leka jaku, baka penambah ng-, be-, ny-, enggau ti ke bukai mega. Ambika chunto ba jaku pengawa transitif aktif bepenambah mua baka ngait, ngetau, nyual, enggau ti bukai mega. Lalu iya mega bisi nerima penambah ari belakang urat leka jaku baka –ka. Ambika chunto baka sayauka, nindukka, tepedaka enggau ti bukai.

Nambahka nya ba jaku pengawa transitif pasif nya ngemai jaku pengawa nya nyadi ari proses ubah tauka transformasyen ayat aktif nyadi ayat pasif. Ambika chunto baka ‘Indai nyait pua tampil seribu nya ke aku’ (ayat aktif). Lalu enti diubah ngagai ayat pasif iya nya ‘pua tampil seribu nya dijait Indai aku ke aku’. (ayat pasif). Dia kitai ulih meda leka jaku nyait ditukar tauka diubah ngagai leka jaku dijait enti iya nyadi ayat pasif ba jaku pengawa.

Kelimpah ari nya, ba jaku pengawa ukai transitif iya ngemai reti jaku nya nadai nerima tauka begunaka penyambut tauka objek entudi genteran leka jaku nya. Leka jaku nya ulih nyadi siti leka jaku ti entap taja pan nadai nerima sebarang penyambut tauka objek baka ba jaku pengawa transitif.

Taja pia, bisi sekeda jaku pengawa ba ukai transitif nya ti enda tau enda dientudika enggau penembu ngambika iya ulih nyadi siti leka jaku ti entap, tang sekeda iya mega enda begunaka penembu. Besenutuk enggau nya, jaku pengawa ukai transitif dibagi ngagai dua raban iya nya bepenembu enggau nadai bepenembu.

Ba jaku pengawa ukai transitif bepenembu nya iya begunaka penembu ngambika iya ulih dikena ngaga ayat tauka dikena maya bejaku enggau orang bukai. Ambika chunto baka gerai nyamai, bepanggalka lengan, meruan sayau enggau ti bukai mega. Iya enda ulih bediri Kediri enti nadai nerima penembu nya.

Kelimpah ari nya, ba jaku pengawa transitif nadai penembu nya enda begunaka penembu kena meri leka jaku nya entap sereta jaku nya mega ulih dikena bekomunikasyen enggaau orang bukai besehari- sehari ba pengidup kitai. Ambika chunto baka nyabak, bejalai, tuchum, manjung, dani enggau ti ke bukai mega. Kitai ulih meretika utai ti dikenataika ari siti leka jaku nya aja. Enggau jaku bukai, jaku pengawa transitif nadai penembu tu ulih bediri Kediri enggau nadai sukung ari jaku ti ke buka.

 Kelas Jaku Adjektif

Jaku adjektif nya ngemai reti leka jaku ti nyadi leman pugu ba dalam pasuk rambai jaku adjektif. Rambai jaku adjektif nya tau datai ari seleka jaku adjektif enggau leman penerang ti ke bukai baka jaku bantu tauka jaku penguat. Jaku tu mega ulih dikelala ari jaku nama enggau jaku pengawa, ari chara jaku adjektif nya ditempa ti suah datai entudika jaku penguat. Ambika chunto baka: amat sayau, sakit bendar, tinggi amat, nyelai amat enggau ti bukai mega.

Enggau nya mega, taja pan jaku adjektif nadai ngembuan bagi ke terang tauka nyengala, tang nitihka ari apak semantik, kitai ulih meda bagi ba jaku adjektif nya kira- kira dalam sepuluh bengkah ti bisi dikena kitai semua. Iya keterubah iya nya jaku adjektif gaya. Nitihka bup sereba reti, gaya nya nunjuk ngagai gamal utai ti dipeda. Ambika chunto ba jaku adjektif gaya tu  baka manah, regas, gerai, berani enggau ti bukai mega.

Kelimpah ari nya, tau mega dipeda ba jaku adjektif chura ti nunjuk ngagai mayuh bengkah chura ba pengidup kitai semua. Ambika chunto baka mansau, chelum, kelabu, gadung, burak enggau ti ke bukai. Chunto ayat iya nya baka ‘ baju ti dikena iya sehari tu bechura chelum. Bisi mega apak ba jaku adjektif sukat tauka takat. Sekeda leka jaku ti ulih nerangka senentang sukat iya nya baka panjai, pandai, mit, besai, bauh, surut enggau ti bukai mega ti bekaul enggau sukat.

Nambahka nya, bansa jaku adjektif tu mega ulih dipeda ari apak jaku adjektif tukuh tauka gamal utai ti nyadika leman penerang ba sesebengkah utai ti ulih dipeda kitai aja. Ambika chunto baka segala, bajik, tegap, chengkik enggau ti ke bukai mega. Kelas jaku adjektif tu mega ulih dipeda ari apak jaku adjektif maya ti ngayanka konsep tauka tukuh maya tauka timpuh ba sesebeng leka jaku ti deka dikena. Ambika chunto baka kelia, pagila, tumu, diatu, lagi, jampat enggau ti ke bukai mega. Chunto iya ba ayat baka ‘gaya pengidup Ini aku baka agi kelia menya laban ti mayuh enda nemu senentang dunya ke maju diatu.’

Enggau nya mega, tau mega dipeda ari jaku adjektif seraka ti nunjuk ngagai tukuh leka jaku ti bekaul enggau ruang seraka entara dua bengkah utai ti nyadika penerang ba jaku nama nya. Reti seraka nitihka bup sereba rei iya nya nunjuka ngagai penyauh dua iti endur tauka dua bengkah utai. Ambika chunto baka semak, ujung, takah, selepak, seberai enggau ti bukai mega. Ambika chunto ba ayat iya nya ‘bilik kami takah dua pintu ari bilik tuai rumah ba rumah panjai din’.

Iya ti ke bukai ba bagi dalam jaku adjektif iya nya jaku adjektif chara ti bekaul enggau leka jaku ti ngemai reti leman perangai tauka ulah ti nyadika penerang ba jaku nama. Ambika chunto baka sikar, suah, lubah, bejimat enggau ti ke bukai mega. Lalu chunto iya ba ayat iya nya ‘Janti endang siku orang ti chukup bejimat maya ti diasuh ngereja sesebengkah pengawa ti diasuh orang ngagai iya’.

Nambahka nya, bisi mega jaku adjektif rawang ti datai ari leka jaku baka sepi, peda, dinga, bau enggau tegu. Tau mega ari rakup semua lima bengkah pengerawang akal mensia nya tadi lalu nyadika penerang ba jaku nama. Ambika chunto baka manis, masin (sepi), manah, jai (peda), sengian, ragak (dinga), bari, rum (bau), begeru, kering (tegu) enggau ti kepenudi iya nya rawang rakup baka ba leka jaku beresi ari rakup (tegu + peda +bau). Chunto ba ayat iya nya ‘rampa menua kitai enda tau enda beresi ngambika kitai ulih ngurangka penyakit ti datai ari pemeresi rampa menua;.

 Kelas Jaku Tugas

Kelas jaku tugas nya datai ba dalam ayat ti nyadika leman pugu ba dalam predikat sekalika ba predikat rambai jaku nama, rambai jaku pengawa tauka predikat rambai jaku adjektif. Kelas jaku tugas nya mega ulih dipeda kitai datai ari dalam ayat, klausa tauka rambai jaku dikena nanggam ayat ngambika nyadi ayat ti engkeman. Sekalika iya nyadi penyambung, penerang, penentu, penguat, jaku ba pun ayat enggau pengawa ti ke bukai.

Kelas jaku tugas tu mega ulih dipeda kitai nyadika raban jaku ti betukuhka mayuh bengkah tauka disebut heterogen, iya nya datai ari raban ti bebida- bida tang taja pia iya agi bisi ngembuan tukuh ti sama. Dalam jaku Iban, kitai bisi ngembuan enam belas bengkah kelas jaku tugas ti bisi dikena kitai.

Entara bengkah kelas jaku tugas nya baka jaku penyambung ayat ti nyambungka dua pasuk ayat tauka lebih ngambika nyadi siti leka jaku turu. Bisi dua bengkah penyambung iya nya penyambung tunggal ti besambungka dua klausa tauka lebih ti sama tikas tauka tukuh iya. Tau mega disebut ayat breakup, ambika chunto baka enggau, tauka, sereta, lalu, nyerumba enggau ti bukai. Ba jaku penyambung selit, iya dikena nyambung klausa ti enda sama tikas. Ambika chunto baka ti, ke, nya, laban, ketegal, enti, ngambikka enggau ti bukai.

Kelimpah ari nya, ulih dipeda mega ba jaku tekenyit ti dikena ngayanka mayuh macham geragayak ati. Ambika chunto baka tekenyit (apu, akai), gaga (nya baru iya), nasal (naka iya, nya mih) enggau geragayak ati ti ke bukai. Lalu tau mega dipeda ari apak jaku tanya ti dikena nanya. Jaku tanya ti datai dalam ayat nyadi sebagi ari predikat. Ambika chunto baka leka jaku baka ni, berapa, sapa, kemaya enggau ti bukai.

Nambahka nya mega, dalam kelas jaku tugas tu mega bisi ngembuan jaku perintah iya nya leka jaku ti ngembuan tuju ngangkatka balas tauka timbale ngagai perintah, asuh, tagang, pengelalu enggau peminta. Ambika chunto baka tulung, uji, awakka, anang enggau ti bukai. Lalu bisi mega jaku pemendar  ti nunjuk ngagai ngemendarka sesebengkah pekara. Ambika chunto baka jaku pemendar au, nya, amat, bendar enggau betul. Jaku nya ngemendarka sesebengkah pekara tauka pengawa nya dikereja.

Enggau nya mega, bagi kelas jaku tugas ti ke bukai iya nya jaku pun ayat ti nunjuk ngagai leka jaku ti datai ba pun ayat lalu nyadi penanda kena ngelai tamping ayat dalam genteran. Ambika chunto baka kelimpah ari nya, kebuah pia, berindik ari nya enggau ti ke bukai. Kelas jaku tugas ke bukai baka ba jaku prafrasa ti ulih dipeda ba apak jaku bantu, jaku partikel, jaku sangkal, jaku penunjuk, jaku penempat, jaku adap enggau jaku tiap. Semua bagi ba jaku nya ngembuan jaku iya Kediri empu ba dalam atur sepil ba jaku Iban. Semua bengkah jaku nya tadi dikena ba apak ti engkeman dalam atur sepil kitai Iban.

Kelas leka jaku Iban

Kelas leka jaku nama
i)             Jaku ganti nama	Nya, tu, sida, enggi, seduai, nuan, kitai enggau de.
ii)            Jaku nama rama	Sebilik, buah terung, pasar, salai, asi, periuk, mangkuk, pinggai, sudu, mayau, pemakai enggau tikai.
iii)           Jaku nama menyana	Idup- Mensia( Atun, Sinda, Kirai, Iton enggau Putat. (Ukai mensia) mayau- Sitam. Ukai idup- nadai dalam jerpan.

Kar perugan 10: Pansik Kelas leka jaku nama

Kelas leka jaku pengawa
1)    Jaku pengawa transitif	1)    Aktif-nyeradakka, teabiska, bedulika, teingatka, tebelika, ngeraus, ngerampas, belantak enggau betabur.    2)    Pasif- dibeli, ditengali, didinga, dikena, diempa, dipapaka enggau diperak.
3)    Jaku pengawa ukai transitif	1)    Bepenembu- makai lemai, mangkuk lauk, matahka lengan, asi seperiuk, mua periuk, kerak asi, periuk genuk, temati kutu, charut besai, belantak kening enggau buah guli. 2)    Nadai penembu- makai, ngerampas, ngambi, ngeraus, gegetar enggau nyapai.

Kar perugan 11: Pansik kelas leka jaku nama

Kelas jaku adjektif
1)    Jaku adjektif gaya	Pandai, kesal, takut, charut, lapar, tegepang, rangka enggau pemedis.
2)    Jaku adjektif chura	Chelum
3)    Jaku adjektif sukat	Besai,
4)    Jaku adjektif tukuh	Rungguk- rungguk enggau menchul
5)    Jaku adjektif maya	Lemai, sekali tu, tadi enggau baru.
6)    Jaku adjektif seraka	Nadai dalam jerpan.
7)    Jaku adjektif emosyen	Tegepang,
8)    Jaku adjektif chara	Bemunyi, belanda, tepelanting, bejimat, gegetar enggau beguai.
9)    Jaku adjektif rawang	Nyamai, bemunyi, richah
10) Jaku adjektif rakup rawang	Nyamai, pemedis

Kar perugan 12: Pansik Kelas jaku adjektif

Kelas jaku tugas
1)    Jaku penyambung	Nya, ke, enggau, tauka, semadi, enti, ngambika, benung, sereta, laban, enti deka, tang, lalu enggau sambil.
2)    Jaku tekenyit	Nya nyeh! Empa pengebam nyawa.
3)    Jaku tanya	Lapa de enda meda aku? Enggau nyau kinika mata de, deh?
4)    Jaku perintah	Anang enggai belajar bebendar, ngambika ulih nyadi pandai, peda nuan Kirai nya Indai.
5)    Jaku pun ayat	Nadai dalam jerpan.
6)    Jaku bantu	Deka, ulih, benung,
7)    Jaku penguat	Bulih amat,bebendar ngempang, semakin majak
8)    Jaku partikel	Tak, mih, nya, neh, dih
9)    Jaku sangkal	Nadai, enda, anang
10) Jaku penunjuk	Nya,
11) Jaku penempat	Baka, enggau, ke, ba,
12) Jaku pemendar	Nadai dalam jerpan.
13) Jaku adap	Tisi, sebelah,
14) Jaku teas	Sebelah
15) Jaku penekan	Nya
16) Jaku penetap	Jari iya nyau gegetar, ditekung iya pala Sitam, diperak apai iya lalu begaut masu jari,murus kening iya empu.

            Kar perugan 13: Pansik kelas jaku tugas.

 (BIB3102)

MORFOLOGI JAKU IBAN (PENAMBAH)

PENAMBAH

Penambah nya bisi ngembuan empat iti tukuh iya nya, penambah mua, penambah belakang, penambah kepit enggau penambah selit.

Penambah ti nadai dalam jaku iban iya nya morfem kusung enggau tukuh infleksyen. Dua bengkah penambah nya semina bisi ba jaku English aja.

Meri penambah reti nya bejantilka mayuh macham unit tauka tukuh bukai ngagai urat jaku. Lalu ngemai reti ti baru tauka berubah dalam atur jalai jaku.

 

  

Penambah ti tau dikena nempa jaku nama iya nya peN-, pe- enggau juru

2) penambah pe- ditawingka ba urat jaku lalu nadai ngubah munyi ba pun urat jaku. Ambika chunto baka sakit- pesakit. Penanda reti orang tauka nama utai.

Ambika chunto baka: basu- masu, tepan- nepan, arau- ngarau, wan- nguan,kait- ngait,chabut- nyabut, sepi- nyepi enggau ti bukai.

PENAMBAH MUA JAKU ADJEKTIF

Penambah mua ti nempa jaku adjektif iya nya: Nge-, be- enggau beke-. Ambika chunto baka: tinggi- ngeninggi, tangkup- betangkup, berai- bekeberai enggau ti bukai.

Penambah mua ti nempa jaku pengawa iya nya: Pengganti pun m-, n- Penambah ng- Penambah ny- Penambah be- Penambah di- Penambah dipe- Penambah en-,em-,eng- Penambah te- Penambah me-

PENAMBAH MUA JAKU PENGAWA

PENAMBAH MUA

Penambah ti ditambahka ari mua leka jaku tauka dikena ba pun urat jaku.

3) penambah juru nadai dikena ba jaku iban tang bisi nginjau ari jaku bansa bukai. Ambika chunto baka, juru+ bahasa= jurubahasa.

1)    peN- ulih nyadi dalam 4 bengkah penambah iya nya pe-,pem-,pen- enggau peng-. Ambika chunto:niki- peniki, beri- pemeri, datai- penatai enggau ti bukai. Tau dikumbai penanda reti ngagai urat jaku

PENAMBAH BELAKANG

Penambah belakang dalam jaku iban semina bisi ba jaku tumbuh aja. Ambika chunto baka madah- madahka,ngesai- ngesaika enggau ti bukai.

PENAMBAH SELIT

Penambah ti diselitka ba entara leman pelasar tauka urat jaku.

Dalam jaku iban, elman ti tau diselit mimit bendar.

Tukuh ti baka tu enda tentu produktif, semina dikena ba lebas ti ditentuka aja.

Semina bisi ba jaku nama enggau jaku adjektif aja.

Penambah selit jaku nama baka –le- = kelemayang, -er- = serabut

Penambah selit jaku adjektif baka  -be- = teberunsai, teberingkas.

Dalam jaku iban semina siti aja penambah belakang bisi iya nya penambah ka.

Penambah ti ditambahka ari belakang urat jaku tauka leka jaku ti udah dulu nerima penambah ba mua.

 

Jaku pengawa

Jaku pengawa nya dikena nyebut pengawa tauka utai ti nyadi baikka nya ba diri empu tauka dikereja ngagai orang bukai.  Ba jaku pengawa tu ulih dibagi ngagai dua bengkah.

1)    Jaku pengawa transitif

Jaku pengawa transitif nya enda tau enda ditangkanka enggau jaku nama ti nyadika objek ke penyambut iya lalu pun leka jaku nya enda ulih ditingkilka. Ba jaku pengawa transitif tu mega, kitai ulih meda ari dua bagi iya nya aktif enggau pasif.Ba bagi aktif iya ngemai reti iya ti nunjuk ngagai jaku pengawa ti bisi nerima penambah ba mua urat leka jaku enggau penambah belakang. Ambika chunto baka ngait, ngetau, nyual, sayauka, nindukka, tepedaka enggau ti bukai mega. Chunto ba dalam ayat baka; “Indai aku sayauka buah entekai nya”.

Lalu ba bagi pasif, iya ngemai reti nyadi ari proses ubah tauka transformasyen ayat aktif nyadi ayat pasif. Ambika chunto baka “Indai nyait baju Igat (ayat aktif), lalu ayat pasif iya nya “Baju Igat dijait Indai (ayat pasif).

2)    Jaku pengawa intransitif

Sebagi ari kelas leka jaku ti nadai nerima objek terus, iya tau diperimbaika enggau jaku penerang ti nyadika penembu ba ayat nya. Tau dipeda ari dua bagi iya nya bepenembu enggau nadai bepembu. Ba bepenembu, iya begunaka jaku bukai kena nembuka genteran ayat nya. Ambika chunto  baka “Janti rindu makai asi champur” (asi champur nya nyadika penembu ba jaku pengawa makai). Lalu bagi ti kedua iya nya nadai ngemai penembu, iya ulih bediri Kediri taja pan nadai jaku bukai ti nangkaka enggau nya. Ambika chunto baka “Sentia makai” (leka jaku nya ulih diperatika kitai tajapan nadai ngemai penembu.

 Jaku pengawa intransitif nya raban jaku ti nadai nerima objek terus. Iya mega tau diimbai rentayan jaku penerang ti nyadika penembu ayat nya.

Ambika chunto: Indai Lipai mansai ( nadai nerima objek terus)

                              Indai Lipai mansai laban nadai lauk lemai nya (jaku penerang)

Jaku pengawa intransitif

Bepenembu – diau, belinsur, nyadi etb

Nadai bepenembu- tinduk, tuchum

J. p transitif

- Jaku pengawa ti mesti ditangkanka jaku nama ti nyadika objek ke penyambut iya.

- Chunto: nyipak, meresa, muji

- chunto ayat:

1) Ali nyipak bol nuju mua gol

Tau dibagi ngagai 2

1)    Aktif

-       J. P. Ti nerima penambah mua penganti pun m-, n-, penambah kepit nge..ka, be..ka enggau penambah mu any-, ng- enggau meN-.

2)    Pasif

-       J. P. Asil ari proses transformasyen tauka ubah ayat aktif ti nyadi ayat pasif.

1	j.p transitif aktif	j.p transitif pasif
2	Indai aku benung manduk lauk	Lauk benung dipanduk indai aku.
3	Angkie masu gari ba pendai	Gari dibasu Angkie ba pendai.
	Aku macha surat nya	Surat nya aku bacha
	Indu nya teirupka rachun rumput	Rachun rumput diirup indu nya
	Aya Libau nyeruri rumah sida Lika	Rumah sida Lika diseruri Apai Libau

1 Gaga ayat ti ngembuan jaku pengawa intransitif bepenembu enggau nadai bepenembu (2).

Jaku pengawa intransitif bepenembu baka:

i)             Jawing bejalai kaki pulai ke rumah.

ii)            Penyakit Dina nyau belinsur gerai.

Jaku pengawa intransitif nadai bepenembu baka:

i)             Indai aku benung tinduk.

ii)            Siti mandi.

2 Gaga ayat intransitif bepenembu enggau nadai bepenembu ti disempulangka enggau penerang (2).

Intransitif bepenembu enggau penerang:

i)             Indai aku benung masu pinggai ba ujung bilik.

ii)            Sidi bemain bol enggau bala kaban iya ba padang sekul kemari.

Intransitif nadai bepenembu enggau penerang:

i)             Sida sebilik makai ngena jari magang.

ii)            Adik rindu macha bup cherita.

3 Gaga ayat ti ngembuan jaku pengawa transitif aktif ti disempulangka enggau penerang

 (2).

i)             Indai benung betipanka gari kami sebilik di bilik besai.

ii)            Lauk ti disumai Ibu aku malam nya salai gulai enggau buah terung Iban.

4 Gaga ayat ti ngembuan jaku pengawa transitif pasif ti disempulangka enggau penerang (2).

i)             Padi nya diketau sida Indai minggu nyin kemari.

ii)            Ai tuak nya diirup sida Sigat enggau nangka pemayuh.

Jaku pengawa

1) j. p. Tunggal

- jaku ti bediri enggau nadai bepenambah.

- chunto: pulai, terebai, ada etb.

2) j. P. Tumbuh

- jaku pengawa ti nyadi ari proses meri penambah ngagai urat jaku.

- urat jaku nya ukai semina ari  jaku pengawa tang tau mega berasal ari raban jaku bukai baka jaku nama tauka jaku adjektif.

- Leka jaku penambah tau ditambah ba pun, ba ujung, ngepit urat jaku tauka nyelit ba urat jaku.

3) j. P betandu

- proses ti betanduka urat jaku.-

 - Tau dibagi ngagai 3 bansa

- Betandu penuh, betandu sebagi tauka betandu nitihka rentak

A) betandu penuh

- proses betandu penuh urat jaku

- ambika chunto: michit= michit- michit

B) Betandu sebagi

- Urat jaku bepenambah mua baka beju- ju, begiga- giga, betanya- tanya etb.

- Urat jaku bepenambah belakang baka nyebut- senyebut, muput- semuput, malu- semalu.

C) Betandu nitihka rentak

- betandu urat jaku nitihka rentak munyi dalam urat jaku.

i) betandu nitihka rentak munyi konsonan ti sama baka kudang- kasang, kin- kitu, kasak- kanyak.

ii) betandu nitihka rentak munyi vokal ti sama baka sarak- tebererak, butang- betumbang, penapat- inat etb

iii) betandu nitihka rentak meras baka pulai mansang, telentang- tungkup

reti tukuh betandu

-       Pengawa ti beulang- ulang baka ngepai- sengepai, midat- semidat, nekung- senekung

-       Pengawa ti agi meruan tauka terus- menerus baka begedi- gedi, linsum- linsum, rising- rising.

-       Pengawa ti senaka ulih dikereja aka penapat –inat, betunggang- lupung, sarak- tebererak

-       Pengawa ti betimbal tauka bebalas- balas baka beberap- berap, besaut- saut, betimbal- timbal.

Jaku pengawa turu

-       Datai ari dijir dua morfem meras tauka lebih.

-       Dalam jaku Iban, tebal agi jaku pengawa turu datai ari jaku nama.

-       Chunto: terima kasih, tunjuk ajar, ambi ulih etb.

-       Jaku turu ari raban jaku nama tau digaga nyadi jaku pengawa ari proses jaku tumbuh.

-       Jaku turu nerima penambah mua disepil beserara tang lebuh nerima penambah kepit, disepil besambung.

-       Chunto: beterima kasih, betukar ganti, belatarbelakangka.

Rintaika penambah jaku pengawa besereta chunto iya

1)    Penambah mua baka m-, n-, ng-, ny-, be-, di-, dipe-, en-, em-, eng-, te-, enggau me-.

Ambika chunto baka macha, meri, nepan, negi, ngarau, ngempas, nguan, nguit, ngait, ngelalai, nyabut, nyarik, nyungkit, nyepi, berapi, berubat, beribun, belajar, belinsur, bekeberai, bekedegir enggau ti ke bukai mega.

2)    Penambah belakang ka-.

Ambika chunto baka teempaka, gigaka, tindukka, engkahka, besaika, dampihka, belika enggau chunto ti ke bukai.

3)    Penambah kepit baka me..ka, nge..ka, nye...ka, peR...ka, dipeR...ka, beR...ka, teR...ka enggau di...ka.

Ambika chunto baka melakangka, digalika, dikesayauka, berantika, bebaika, naburka, nanamka, malikka, nyelamatka, ngemelika, nginsitka, pelunjakka, tejulukka, empakapka, teperindangka, merinsaka, melika, ngangkatka, ngadaka enggau chunto ti ke bukai.

4)    Penambah selit le ba kelemayang enggau be ba teberunsai.

JAKU TUNGGAL

1  Tau ngundan siti patah sebut tauka lebih ari siti patah sebut.

2) Siti patah sebut tau dipenyadi ari siti vokal (V) aja, tauka siti vokal disempulang enggau siti konsonan (K) tauka beberapa iti konsonan.

3) Konsonan tau datai ari mua tauka ari belakang vokal, tauka ari mua vokal tauka di belakang iya seretai.

4) Dalam jaku iban leka jaku ti pengambis pandak semina bisi nyadi berindik ari siti vokal enggau siti konsonan enggau dua iti vokal ti datai seretai. Ambika chunto baka au,ai,yu,tu enggau ti bukai.

5) Semina jaku Iban ti nadai nerima penambah tauka nadai nengah proses beturu tauka betanduka leka jaku diserangkungka dalam jaku tunggal.

 

               

1)    JAKU TUNGGAL SITI PATAH SEBUT

1)    vv	Au,ai
2)    kv	Tu,ju,ru,ti,ni,ke,wa enggau ti bukai.
3)    vk	It, as, enggau ti bukai.
4)    kvk	Soh, roh, bah, sen, bab enggau ti bukai.
5)    kkvk	Stor, skel, draf enggau ti bukai.
6)    kvkk	Teks, bank, golf, volt enggau ti bukai.
7)    kkkv	Skru enggau ti bukai.
8)    kkkvk	Skrip, straw, skrew enggau ti bukai.

POLA SAKUM KONSONAN-VOKAL

2)    JAKU TUNGGAL DUA PATAH SEBUT

POLA JAKU TUNGGAL DUA PATAH SEBUT

1)    V+ VK	Aus, aur, ais, auh, aum enggau ti bukai.
2)    V+KV	Aku, ubi, ini, aki, aka, adi enggau ti bukai.
3)    V+KVK	Ubat, ikan, ulat, akih, utan enggau ti bukai.
4)    VK+KV	Undi, ampa, enda, inda enggau ti bukai.
5)    VK+KVK	Umpan, untak, empat enggau ti bukai.
6)    KV+V	Dua, tua, sua, dia, bau, rua enggau ti bukai.
7)    KV+VK	Paut, kait, baum, baur enggau ti bukai.
8)    KV+KV	Jala, pasu, buku, garu, buka enggau ti bukai.
9)    KV+KVK	Kapal, pukul, bakul, jarum enggau ti bukai.
10) KVK+KV	Lampu, sunti, sendi, danji enggau ti bukai.
11) KVK+KVK	Bintang, tanduk, sampal, nimbal enggau ti bukai.
12) KV+VV	Buai, tuai, diau, biau, miau enggau ti bukai.