RETI KUMANG

Kemaya diatu hari konsep ‘Kumang’ suah amat nyadika batang randau bala Iban. Iya mega suah agi dikenang lebuh kelebih agi maya nyau deka semak pengerami Gawai laban maya pengerami hari besai baka tu mayuh macham pekit bisi diatur kelebih agi ti bekaul enggau leka jaku kumang nya tadi.

Dalam budaya Iban, Kumang tu suah endar disemaka enggau orang indu ke ngembuan gamal ke pemadu bajik lalu landik dalam semua macham pengawa baka betenun, ngebat, nganyam, enggau mayuh macham pengawa bukai ke endang dikereja indu Iban dulu kelia. Kelimpah ari nya mega, iya sigi alai orang bukai belajar, endur orang betanya, nguluka orang tuai. ‘Kumang’ tu mega indu ti pemadu beberita sereta tampak nama ba menua ti diuan orang Iban. Pendiau kumang ukai semina dipeda bajik tang mega ngembuan pengelandik gawa sereta ulah ke manah. Nya alai ari leka jaku ‘Kumang’ tu Iban endang ari dulu kelia suah bendar besemaka indu ke bajik sereta nyema orang nya baka ‘kumang’.

Ketegal ubah pemansang dunya dia reti sereta konsep leka jaku kumang udah bisi besibil mimit ari konsep dulu kelia. Kemaya hari tu kumang semina disemaka ba pemajik indu nya aja. Nya alai suah amat pekit kumang dikaitka enggau pemajik orang indu lalu diatur maya pengerami Gawai. Taja pan ditujah ubah pemansang dunya, konsep kumang agi ulih diatur-ubah nitihka singkang dunya.

Enti kelia menya pengelandik Kumang sigi disemaka enggau pengelandik iya gawa baka betenun, ngebat enggau nganyam, tang kemaya hari tu pengelandik tu ulih diubah sereta disemaka enggau pemandai tauka pengelandik runding orang indu, ke selalu diuji nengah pengawa betanya saut lebuh ke enggau bepekitka kumang. Orang ke patut enggau bepekit tu iya nya patut tulin indu Iban laban Kumang tu ga sigi indu Iban.

Enti nitih ke jerita tuai tauka ensera kitai Iban, Kumang tu mayuh orang madahka iya anak Bujang Sebalu Ngenang, lalu diri menyadi enggau Tutong. Tutong tu Tuai Rumah orang di menua Gelong. Menua Gelong Batu Nakung tu ku jerita tuai, bepenuduk ba sungai mit Batang Gelong ke bepampangka ai Batang Panggau ba menua Panggau ke alai sida Tutong menyadi diau. Nyadi gamal kumang tu enda ulih disemaka kitai mensia laban badas agi kitai, iya ga badas agi. Enda jauh nyema, baka kitai ke ngagai emperaja. Kebuah pia laban iya udah nyadi siti ‘idealism’ dalam pengidup kitai Iban maya nya menya (Jimbun Tawai).

Pengidup semua bansa di dunya tu bisi idealisma kediri empu, ideal soceity sida iya. Ambika banding baka sida orang putih, idealisma sida iya ke idup rambau Robin Hood kelia. Nya alai sida iya mayuh fairy tale pasal jerita raja-raja sida iya. Ambika sekeda chunto cherita nya baka Cinderella, The Princess and the Frog enggau Snowhite and Seven Dwarfs. Nyadi ba Iban Fairy Tale tu ke dikumbai ensera (Jimbun Tawai).

Enti maya begawai sida kumang sigi datai nemuai ngagai orang begawai. Nya alai enti Iban begawai, indu Iban deka begari manah laban kumang ti datai nemuai ngagai orang ke begawai enggai meda sida iya enda begari manah tauka nyerida kediri.

Indu ke megai jani enda tau enda ngena gari ke manah, ngena ngepan, enda tau ngena kain chelum laban kumang sigi enggai meda orang enda tentu betul bepekayan lebuh maya gawai, kelebih agi orang ke megai piring.

Ba budaya Iban, konsep pendiau Iban bisi utai ke dikumbai Kumang Menyarung, iya nya bansa gerama ke ulih diau dalam ai tauka ba tanah. Bansa Iban ngumbai nya kumang menyarung laban iya ulih keluar ari ai lalu nyadi mensia lalu begamal baka kumang, bajik tang ukai Iban. Nya alai iya dikumbai kumang menyarung. Nya alai gelar Kumang tu semina kena bansa Iban aja.

Lalu pia mega ba pengawa bepekit Kumang, orang indu ke enggau pekit tu enti nitihka budaya Iban endang enda tau sengapa masukka ngepan Iban. Kebuah pia, laban ngepan Iban endang bisi tusun iya empu lalu enti bisi besibil iya tau nachatka pendiau sereta chara bepekayan ke betul lalu enda ulih diambi kitai nyadi pemenang nangkup gelar Kumang.

Ambika banding, baka sugu tinggi ke dikena orang ke enggau bepekit Kumang, patut sugu tinggi ke sigi iya nya tinggi ari sugu tinggi ke bukai nandaka iya nya indu dara ke ngembuan pemajik, baka Kumang. Sugu tinggi ti baruh ukai ungkup indu dara tang indai orang.

Pia mega, chura ngepan, orang ke deka enggau bepekit Kumang nya ngepan ti bechura mansau terang laban nya nanda ke iya ‘Kumang’ ke sigi indu ke tau diambi nyadi ke bini orang bujang berani baka sida Keling.

Nya alai enggau penerang konsep tu nyangka orang ke bisi pengerindu enggau masuk pekit kumang ulih betatika pekara ti betul. Pia mega ngagai nembiak redak rebak baru, konsep kumang endang suah amat nyelai ari konsep dalam budaya Iban laban ke kurang penemu sereta peanerang ti engkeman senentang pekara tu.

Lalu pia mega, aku arapka nembiak rebak baru patut belematika konsep leka jaku Kumang ke bendar ba raban bansa kitai Iban enggaika kitai ngelenyauka adat ke patut lalu atur iya sereta sesebengkah pengawa nya enda semina ditempayakka pia aja.